მიუხედავად იმისა, რომ მეთ გალა რამდენიმე თვის წინ გაიმართა, ჯერ კიდევ არ წყდება მასზე საუბარი. ამის მიზეზი კი კიმ კარდაშიანი და ღონისძიებისთვის მის მიერ შერჩეული მერილინ მონროს ნამდვილი კაბაა, რომელიც მან მუზეუმიდან ითხოვა. ჟან ლუისის კაბა მერილინს 1963 წელს Happy Birthday, Mr. President-ის სიმღერის დროს ეცვა.

ამ ფაქტმა საზოგადოების უკმაყოფილება რამდენიმე მიზეზის გამო გამოიწვია. ექსპერტები საჯაროდ გამოეხმაურნენ კიმის გადაწყვეტილებას და აღნიშნეს, რომ კარდაშიანმა მნიშვნელოვან ექსპონატს საფრთხე შეუქმნა, სხვა ვარსკვლავებს კი ცუდი მაგალითი მისცა. თუ ცოტა ხნის წინ გავრცელებული ფოტოებით ვიმსჯელებთ, ექსპერტები არ ცდებოდნენ.

მერილინ მონროს ნივთებისა და არქივების ყველაზე დიდი კერძო კოლექციის ოფიციალური ინსტაგრამგვერდი ავრცელებს ფოტოებს, რომლებშიც ნათლად ჩანს, რომ მეთ გალას შემდეგ კაბა დაზიანებულია. კერძოდ, ქსოვილი გაწელილია, კაბას კი ძვირფასი თვლები აკლია.

მერილინ მონროს კოლექციის წარმომადგენლებმა ინსტაგრამზე კაბის დაზიანებაში კიმთან ერთად მუზეუმი Ripley’s Believe It or Not-იც დაადანაშაულეს, რადგან სწორედ მათ მისცეს კიმს კაბის ჩაცმის უფლება, თანაც საზოგადოებას არწმუნებდნენ, რომ კაბას საფრთხე არ ემუქრებოდა. კიმ კარდაშიანსა და მუზეუმის წარმომადგენლებს მომხდარზე კომენტარი ჯერჯერობით არ გაუკეთებიათ.

სოციალურ ქსელებში კიმ კარდაშიანს და მუზეუმს საზოგადოებაც აქტიურად აკრიტიკებს. მათ შორის კაბის ესკიზის შემქმნელი ბობ მაკიცაა, რომლის თქმითაც, კაბა მერილინის გარდა არავის არ უნდა ჩაეცვა.

"ვფიქრობ, ეს დიდი შეცდომა იყო. მერილინი ქალღმერთი იყო. შეშლილი ქალღმერთი, მაგრამ მაინც ქალღმერთი. ის გასაოცარი იყო. კაბა მისთვის შეიქმნა. მის გარდა ის არავინ უნდა ჩაიცვას", — განაცხადა ბობ მაკიმ.

აღსანიშნავია, რომ ეს ერთადერთი მიზეზი არაა, რის გამოც კიმ კარდაშიანი მეთ გალაზე გააკრიტიკეს. კიმმა ღიად ისაუბრა იმაზე, რომ კაბის მოსარგებად 3 კვირაში მკაცრი დიეტით 7 კგ დაიკლო. ამ განცხადებამ საზოგადოების უარყოფითი რეაქცია გამოიწვია, რადგან, მათი თქმით, კიმი სხვებს არაჯანსაღი და სიცოცხლისთვის საშიში ცხოვრების წესისკენ უბიძგებდა, წონასთან დაკავშირებულ სტერეოტიპებს ამყარებდა და კვებითი აშლილობის მქონე ადამიანების მდგომარეობასაც აუარესებდა.

მოგვიანებით კიმი წონის დაკლებაზე კომენტარებს გამოეხმაურა და განაცხადა, რომ არაჯანსაღი არაფერი გაუკეთებია:

"გამოდის, რომ კრისტიან ბეილს წონის დაკლება ფილმისთვის შეუძლია და ეს მისაღებია. რენე ზელვეგერმაც კი მოიმატა წონაში როლისთვის. ეს ჩემთვისაც იგივეა. მე არ მითქვამს, მოდით, ყველამ მოკლე დროში წონაში დაიკელით-მეთქი. არაჯანსაღი არაფერი გამიკეთებია", — განაცხადა კიმმა.

ამავე თემაზე: