რა თემაზეც არ უნდა იმართებოდეს მეთ გალა, კიმ კარდაშიანი მსოფლიოს ყურადღების მიპყრობას მაინც ახერხებს. 2022 წლის ღონისძიებაზე კიმი მერილინ მონროს კაბით წარსდგა, რომელიც მონროს Happy Birthday, Mr. President-ის შესრულების დროს ეცვა. საზოგადოების ნაწილმა კიმს არჩევანი მოუწონდა, თუმცა მეორე ნაწილმა კარდაშიანი რამდენიმე მიზეზის გამო გააკრიტიკა.

გარდა იმისა, რომ კიმს ისტორიული კაბისთვის საფრთხის შექმნის გამო უსაყვედურეს, კრიტიკის ქარცეცხლში კიმი კიდევ ერთი მიზეზის გამო გაეხვა. კიმმა ღონისძიებაზე განაცხადა, რომ კაბის მოსარგებად, რომელიც სპეციალურად მერილინის ტანზე იყო შეკერილი, 21 დღეში დაახლოებით 7 კილო დაიკლო. მისი თქმით, კაბაში ჩასატევად 3 კვირა მკაცრ დიეტაზე იყო — რაციონიდან შაქარი და ნახშირწყლები ამოიღო, სარბენ ბილიკზე ვარჯიშობდა და ე.წ. საუნის კოსტიუმი ეცვა.

ინტერვიუს შემდეგ კიმი არაჯანსაღი სილამაზის სტანდარტების წახალისებაში დაადანაშაულეს. მის განცხადებას სპეციალისტებიც გამოეხმაურნენ და თქვეს, რომ დროის მცირე მონაკვეთში ბევრი კილოგრამის დაკლება მიზანშეწონილი არ იყო და მსგავსი განცხადებები კვებითი აშლილობის მქონე ადამიანებზეც უარყოფითად მოქმედებდა.

რამდენიმე თვის გასვლის შემდეგ კიმი კრიტიკას The New York Times-თან ინტერვიუში გამოეხმაურა. ის თვლის, რომ წონაში დაკლება არავისთვის უთხოვია და მიზნის მისაღწევად არც არაჯანსაღი გზისთვის მიუმართავს.

"გამოდის, რომ კრისტიან ბეილს წონის დაკლება ფილმისთვის შეუძლია და ეს მისაღებია. რენე ზელვეგერმაც კი მოიმატა წონაში როლისთვის. ეს ჩემთვისაც იგივეა. მე არ მითქვამს, მოდით, ყველამ მოკლე დროში წონაში დაიკელით-მეთქი. არაჯანსაღი არაფერი გამიკეთებია", — განაცხადა კიმმა.

როცა ჰკითხეს, რა მოხდებოდა, წონაში რომ ვერ დაეკლო, კიმმა ასე უპასუხა:

"უბრალოდ [მეთ გალაზე] ვერ წავიდოდი და ეს ჩემთვის არაფერს ნიშნავს. უბრალოდ მნიშვნელოვანი იყო, რომ ჩემი მიზნისთვის მიმეღწია".

ამავე თემაზე: