რუსების მიერ ოკუპირებული ქალაქებიდან უკრაინელებს ხშირად იტაცებენ და იძულებით ან მოტყუებით რუსეთში გადაჰყავთ. იქ შესასვლელად მათ ე.წ. ფილტრაციის ბანაკები უნდა გაიარონ. The Guardian-ის სტატიაში ლტოლვილები იხსენებენ შეურაცხყოფის ფაქტებს, რომლებიც ბანაკებში გადაიტანეს.

რატომ არის მნიშვნელოვანი: აშშ-ის ცნობით, "გაფილტვრა" გულისხმობს ადამიანების ცემასა და წამებას, რათა დადგინდეს, არიან თუ არა ისინი უკრაინული სახელმწიფოს მიმართ ერთგულები.

  • ეუთოში აშშ-ის ელჩის ცნობით, ბანაკებში ადამიანებს დეტალურ შემოწმებას უტარებენ, მათზე ინფორმაციას აგროვებენ, ხშირად კი, პირად დოკუმენტებსა და ნივთებს ართმევენ;
  • მისი თქმით, იძულებით გადაადგილება და ძალადობა, რომელსაც ე.წ. ფილტრაციის ბანაკებში აწყდებიან, ომის დანაშაულია.

დეტალები: ე.წ. ფილტრაციის ბანაკები ძირითადად დონეცკის დე ფაქტო რესპუბლიკის ქალაქებსა და სოფლებშია თავმოყრილი. მარიუპოლიდან ავტობუსებით გამოქცეულ უკრაინელებს ეუბნებიან, რომ უკრაინის კონტროლირებად ტერიტორიებზე წაიყვანენ, თუმცა ხშირად სწორედ იქ მიჰყავთ.

  • ე.წ. ფილტრაცია ორი მიმართულებით სრულდება: ან "გაივლი" დაკითხვას და მცირე ზომის, ფილტრაციის დამადასტურებელ ქაღალდს მოგცემენ, ან შემდგომი დაკითხვებისთვის დაგაკავებენ.
  • ბანაკებში მოხვედრილ ადამიანებს უმეტესად იატაკებზე ან მუყაოს ყუთებზე სძინავთ. მათ დღეში ერთხელ აჭმევდნენ, შემდეგ რუსებმა სასადილო დახურეს და უთხრეს, საკვები თავად მოეძებნათ.

ოლენა იხსენებს, რომ დაკითხვამდე სამი კვირა მშიერსა და გაყინულს იატაკზე ეძინა, თუმცა ყველაზე დიდი დამცირება მაშინ გადაიტანა, როცა რუსი ოფიცერი ე.წ. ფილტრაციის ბანაკში ზედის გახდას სთხოვდა.

  • "მხრებზე ჩალურჯებები შეიძლება მიუთითებდეს, რომ სნაიპერი ხარ. ვუთხარი, რომ აგვისტოში 60 წლის ვხდები, როგორ ვიქნები სნაიპერი?".

მაქსიმისა და იულიასთვის ე.წ. ფილტრაცია ხანგრძლივი განსაცდელი იყო. თითქმის ერთი თვე მეგობართან იცდიდნენ, სანამ მათი რიგი მოვიდოდა. ამბობენ, რომ დერეფანში ყოფნის დროს უკრაინელი ჯარისკაცი შენიშნეს, რომელსაც მუხლებზე მყოფს, ხელებშეკრულს ჰკითხავდნენ.

  • "ჩვენი ნომერი იყო 347. მიდიხარ და ეკითხები, დღეს რომელ რიცხვზე არიან და აანალიზებ, რომ რიცხვი მხოლოდ ორით ან სამით შემცირდა. რატომ იყო ასეთი ნელი? თავად პროცესს 30 წუთი სჭირდება", — თქვა მაქსიმმა.
  • "მათ უნდა უთხრა, რომ რუსეთში დარჩენა და ცხოვრების აწყობა გინდა. ამ შემთხვევაში, თავს დაგანებებენ", — აღნიშნა მაქსიმმა.

ჟანა ჰყვება, რომ რუსეთის ერთ-ერთ კუნძულზე იძულებითი დეპორტაციის თავიდან ასაცილებლად, ბანაკის უკანა შესასვლელიდან შეუმჩნევლად გაიპარა.

  • მხოლოდ მიგრაციის ბარათებით, ოჯახთან ერთად ნოვოაზოვსკიდან ტაგანროგში ავტობუსით გაემგზავრა, მატარებლით ვლადიკავკაზში, შემდეგ კი ყაზბეგის საზღვრის გავლით საქართველოში შემოვიდა.