აშშ-ის პრეზიდენტმა, ჯო ბაიდენმა ხელი მოაწერა უკრაინისთვის 40 მილიარდი დოლარის დახმარების პაკეტს. თეთრი სახლის ოფიციალური წარმომადგენლის განცხადებით, კანონპროექტი სეულში გაიგზავნა, რადგან პრეზიდენტი ვიზიტით იქ იმყოფება.

ამერიკის შეერთებული შტატების სენატმა უკრაინისთვის დახმარების პაკეტს მხარი დაუჭირა. კანონპროექტს 86 მომხრე და 11 მოწინააღმდეგე ჰყავდა.

კანონპროექტს მხარი ყველა დემოკრატმა სენატორმა დაუჭირა, წინააღმდეგი იყვნენ რესპუბლიკელები. კენჭისყრამდე სენატის უმრავლესობის ლიდერმა, ჩაკ შუმერმა თქვა, რომ სენატი შეასრულებს პირობას და დადგება უკრაინელი ხალხის გვერდით. მანვე თქვა, რომ 40 მილიარდი დოლარის სამხედრო, ეკონომიკური და ჰუმანიტარული დახმარება დააკმაყოფილებს უკრაინელი ხალხის საჭიროებებს, რადგან ისინი იბრძვიან გადარჩენისთვის.

უკრაინის პრეზიდენტმა, ვოლოდიმირ ზელენსკიმ სენატს მადლობა გადაუხადა და აღნიშნა, რომ მოუთმენლად ელოდნენ პრეზიდენტის ხელმოწერას კანონპროექტზე.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში