ფინეთმა და შვედეთმა NATO-ში გაწევრიანების განაცხადი ოფიციალურად წარადგინეს. ალიანსის გენერალური მდივნის, იენს სტოლტენბერგის განცხადებით, ეს არის ისტორიული მომენტი, რომელიც უნდა გამოიყენონ. როგორც Reuters წერს, პროცესს, სავარაუდოდ, რამდენიმე კვირა დასჭირდება.

"მივესალმები ფინეთისა და შვედეთის თხოვნას NATO-ში გაწევრიანების შესახებ. თქვენ ჩვენი უახლოესი პარტნიორები ხართ და NATO-ში თქვენი გაწევრიანება გაზრდის ჩვენს საერთო უსაფრთხოებას", — თქვა სტოლტენბერგმა.

მან აქამდეც არაერთხელ განაცხადა, რომ ის მოელის, რომ ყველა მოკავშირე მიესალმება ქვეყნების პერსპექტიულ წევრობას და რომ გაწევრიანების პროცესი იქნება სწრაფი.

თურქეთის პრეზიდენტის, რეჯეფ თაიფ ერდოღანის განცხადებით, თურქეთს არ აქვს პოზიტიური შეხედულებები ფინეთისა და შვედეთის NATO-ში გაწევრიანებასთან დაკავშირებით.

იენს სტოლტენბერგის თქმით, თურქეთთან მუშაობენ და ეს საკითხი, შესაძლებელია, მოგვარდეს. ამის შესახებ ფინეთისა და შვედეთის ელჩებთან, შეხვედრისას ისაუბრა, როდესაც მათ ოფიციალური განაცხადი გააკეთეს.