ლელო პრემიერმინისტრ ირაკლი ღარიბაშვილს მიმართავს, დაუყონებლივ გაასაჯაროვოს ინფორმაცია იმის შესახებს, შეხვდა თუ არა თბილისში კრემლთან დაახლოებულ პირს და შეხვედრის შემთხვევაში გაასაჯაროვოს საუბრის შინაარსიც.

პარტია მიიჩნევს, რომ ინტერნეტში გავრცელებული, სავარაუდოდ, ვლადიმირ ევტუშენკოვისა და ბიძინა ივანიშვილის საუბრის ავთენტურობის დადასტურების შემთხვევაში, შესაძლოა, საქართველოს ხელისუფლება და ივანიშვილი სანქციების რეჟიმის გვერდის ავლაში დახმარების აღმოჩენაში დამნაშავედ ჩაითვალოს. ლელოს თქმით, ამის შედეგი ქვეყნისთვის უმძიმესი იქნება.

"მოვითხოვთ, რომ მაღალი სახელმწიფო და საჯარო ინტერესის გათვალისწინებით, საქართველოს პრემიერმინისტრმა, ირაკლი ღარიბაშვილმა დაუყონებლივ გაასაჯაროვოს ინფორმაცია — ჰქონდა თუ არა შეხვედრა თბილისში ვიზიტით ჩამოსულ კრემლთან დაახლოებულ პირთან, რუსეთის მმართველი პოლიტიკური პარტიის პოლიტსაბჭოს წევრ და როსტოვის რეგიონალი საკრებულოში ფრაქციის თავმჯდომარის მოადგილესთან, ალი უზდინოვთან. თუ შეხვედრა შედგა, გასაჯაროვდეს საუბრის შინაარსი. პარტიის საპარლამენტო წარმომადგენლობა საქართველოს შსს-სგან ასევე ოფიციალურად გამოითხოვს ინფორმაციას, აღნიშნული პირის მიერ გასული 2 თვის მანძილზე საქართველოს სახელმწიფო საზღვრის კვეთის თაობაზე", — ვკითხულობთ განცხადებაში.

დღეს ინტერნეტში, სავარაუდოდ, ვლადიმირ ევტუშენკოვისა და ბიძინა ივანიშვილის საუბარი გავრცელდა. ევტუშენკოვი მილიარდერი ოლიგაქრია, რომელსაც პუტინთან აფილირებულ პირად მიიჩნევენ, მას დასავლეთმა რუსეთის უკრაინაში შეჭრის შემდეგ, სანქციები დაუწესა. ჩანაწერში საუბარია ბიზნესგეგმებზე, რამაც გააჩინა მოსაზრება, რომ ოლიგარქები სანქციებისთვის გვერდის ავლას ცდილობენ.

სავარაუდოდ, ივანიშვილი, საუბრის დასაწყისში ამბობს: "სიტუაცია არც ისე სასიხარულოა, მაგრამ რას ვიზამთ, უნდა გაუძლო". სავარაუდოდ, ევტუშენკოვი კი პასუხობს: "აბა, რას ვიზამთ, ბორ. ჩვენ იმდენჯერ გვცემა ცხოვრებამ, რომ გაძლება გვასწავლა".

ამის შემდეგ, სავარაუდოდ, ევტუშენკოვი ამბობს, რომ იდეა აქვს და თხოვს, სავარაუდოდ, ივანიშვილი შეხვდეს მის წარმომადგენლებს, ალის და დავიდს, რომელებსაც ის იცნობს. რუსი ოლიგარქი არ აკონკრეტებს, რას გულისხმობს, თუმცა ახსენებს მარცვლეულობას და სავარაუდოდ, ივანიშვილს ეუბნება, რომ თუ ამაში ის ჩაერთვება, მაშინ თავადაც მიიღებს მონაწილეობას. მხარეები თანხმდებიან და საუბარი სრულდება.