რუსეთის თავდაცვის სამინისტრო, მათ მიერ წამოყენებული ულტიმატუმის შეუსრულებლობის გამო, მარიუპოლის მცველების განადგურებით იმუქრება. რუსეთმა მარიუპოლში მებრძოლებს დანებებისკენ მოუწოდა.

"თუმცა, კიევის ნაციონალისტური რეჟიმმა დანებებასთან დაკავშირებით მოლაპარაკებების წარმოება აუკრძალა", — ციტირებს CNN რუსეთის თავდაცვის სამინისტროს.

გამოცემის ცნობით, სამინისტრო ამტკიცებს, რომ უკრაინელი ჯარისკაცებისგან, რომლებიც ადრე ჩაბარდნენ, აქვთ ინფორმაცია, რომ ქალაქში არის 400-მდე უცხოელი დაქირავებული სამხედრო, რომლებიც უკრაინელ მებრძოლებს შეუერთდნენ.

რუსეთმა მარიუპოლის მცველებს ულტიმატუმი წაუყენა და მოუწოდა დღეს, 17 აპრილს 13:00 საათამდე დანებებულიყვნენ. მარიუპოლის მერის მრჩეველმა თქვა, რომ ულტიმატუმის მიუხედავად უკრაინული ძალები განაგრძობენ ბრძოლას.

გუშინ, 16 აპრილს უკრაინის პრეზიდენტმა, ვოლოდიმირ ზელენსკიმ თქვა, რომ თუ რუსეთი მარიუპოლის მცველებს გაანადგურებს, ეს მოლაპარაკებების გაგრძელებას შეუძლებელს გახდის.

დაახლოებით 100 000 ადამიანი რჩება მარიუპოლში და მის მიმდებარე ტერიტორიაზე, რომლებიც, როგორც ცნობილია, ძირითადად რუსეთის კონტროლის ქვეშ არიან. მარიუპოლში რუსების წინააღმდეგ აზოვის ბატალიონი და 36-ე საზღვაო ქვეითი ბრიგადა იბრძვის. 36-ე ბრიგადა აზოვის ბატალიონს 13 აპრილს შეუერთდა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში