ნაციონალური მოძრაობის წევრები, ნიკა მელია, ეკა ხერხეულიძე და კობა ნაყოფია უკრაინაში ჩავიდნენ. ინფორმაცია On.ge-ს პარტიის პრესსამსახურში დაუდასტურეს. უკრაინაშია საქართველოს მე-4 პრეზიდენტი, გიორგი მარგველაშვილიც.

ნიკა მელიას განცხადებით, ისინი უკრაინაში არა ოპოზიციას, არამედ ქართველ ხალხს წარმოადგენენ.

"მნიშვნელოვანია, რომ ამ დელეგაციის ფარგლებში, ჩვენ მოგვეცემა შესაძლებლობა, რომ ბევრ შეხვედრაში მივიღოთ მონაწილეობა. დღეს ჩვენ აქ და ახლა არ წარმოვადგენთ ქართულ ოპოზიციას. აქ და ახლა ჩვენ წარმოვადგენთ ქართველ ხალხს, რომლის უმრავლესობაც არის სოლიდარული უკრაინის მიმართ", — განაცხადა მან მთავარ არხთან.

მარგველაშვილის თქმით, ჩავიდნენ, რომ აასრულონ საქართველოს მოქალაქეების სურვილი, "მაღალი დონის წარმომადგენლობა იყოს წარმოდგენილი უკრაინაში". ასევე, იმისთვის, რათა უკრაინასა და ქართველ მებრძოლებს აჩვენონ, რომ მათ გვერდით დგანან.

"ეს გრძნობა იყო ის, რაც გარკვეულ ხინჯად მქონდა მეც, იგივე ემოცია ჰქონდა პრეზიდენტ სააკაშვილსაც. ჩვენ ერთობლივად გადავწყვიტეთ აქ წამოვსულიყავით და გვეჩვენებინა უკრაინელი ხალხისთვის, რომ პრეზიდენტები ვდგავართ უკრაინელი ხალხის გვერდით და ეს ერთად დგომა არის უცვლელი და ამას არ ცვლის არაფერი", — თქვა მაგრველაშვილმა.

უკრაინაში დღეს, 15 აპრილს საპარლამენტო დელეგაციაც გაემგზავრა. ნაციონალურმა მოძრაობამ მათთან ერთად ვიზიტში მონაწილეობაზე უარი თქვა.

მოწვევის შემდეგ პაპუაშვილი ამბობდა, რომ რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანდა.

"არის თუ არა სათანადო, "არასათანადო" უწოდო მეგობარ ქვეყანაში ჩასვლის მოწვევას, რომ დაინახო მისი უბედურება, გაიზიარო მისი მწუხარება, უთხრა მხარდამჭერი სიტყვები? მგონია, რომ მეგობარმა ეს უნდა გააკეთოს მოწვევის გარეშე", — ასე უპასუხა მაშინ უკრაინის რადას თავმჯდომარემ კოლეგას.

13 აპრილს პაპუაშვილსა და სტეფანჩუკს ონლაინშეხვედრა ჰქონდათ. პარლამენტის განცხადებით, ისინი შეთანხმდნენ, რომ გაუგებრობის თავიდან ასარიდებლად კომუნიკაცია მნიშვნელოვანია. იმავე დღეს რადას თავმჯდომარემ დაწერა, რომ საქართველოსა და უკრაინას შორის არსებული მცირე გაუგებრობები დასრულა. მისი თქმით, უკრაინაში დეპუტატების ვიზიტი დაადასტურებს ქვეყნებს შორის მეგობრულ ურთიერთობას.

დღეს, 15 აპრილს პარლამენტის ვიცე-სპიკერმა, გია ვოლსკიმ ნაციონალური მოძრაობა შესაძლო პროვოკაციებში დაადანაშაულა. მისი თქმით, ინფორმაცია უკრაინის სპეცსამსახურებს უკვე მიეწოდათ. ვოლსკი ამბობს, რომ ინფორმაცია სუს-ს "საკმაოდ სარწმუნო წყაროსგან" აქვს. სახელმწიფო უსაფრთხოების სამსახურმა გამოძიება სახელმწიფო-პოლიტიკური თანამდებობის პირზე თავდასხმის მუხლით დაიწყო.