შინაგან საქმეთა სამინისტროს ინფორმაციით, დააკავეს 1960 წელს დაბადებული პირი, რომელმაც 31 მარტს გლდანში უკრაინის მოქალაქის ავტომობილი გაქურდა.

უწყების ცნობით, ის წარსულში ქურდობისთვის მრავალჯერაა ნასამართლევი და ამჟამად პირობითი მსჯავრის ქვეშაა. შსს-ის განცხადებით, პოლიციამ ნაქურდალი ნივთები ნივთმტკიცების სახით ამოიღო.

"გამოძიებით დადგინდა, რომ ბრალდებულმა მიმდინარე წლის 31 მარტს, გლდანში, ვასაძის ქუჩაზე, უკრაინის მოქალაქის კუთვნილი ავტომობილიდან სხვადასხვა ნივთი მოიპარა და შემთხვევის ადგილიდან მიიმალა", — ნათქვამია განცხადებაში.

გამოძიება სისხლის სამართლის კოდექსის 177-ე მუხლის მე-2 ნაწილის 1 ქვეპუნქტით და ამავე მუხლის მე-3 ნაწილის დ ქვეპუნქტით მიმდინარეობს, რაც სატრანსპორტო საშუალების წინააღმდეგ ჩადენილ ქურდობას გულისხმობს, რამაც მნიშვნელოვანი ზიანი გამოიწვია. დანაშაული 4-დან 7 წლამდე თავისუფლების აღკვეთას ითვალისწინებს.

პირველ აპრილს უკრაინის მოქალაქემ, ელიზავეტა ფილოტამ On.ge-ს განუცხადა, რომ მანქანიდან ტანსაცმელი და ფეხსაცმელიც კი იყო წაღებული. მისივე თქმით, მანქანას უკრაინული ნომრები ჰქონდა და არ ელოდა, თუ ლტოლვილებს ასე მოექცეოდნენ. ელიზავეტა ლუგანსკის ოლქის ქალაქ რუბეჟნოიდანაა ლტოლვილი და მანქანაში ის ნივთები ჰქონდა, რომლის გადარჩენა და წამოღებაც შეძლო. წერდა, რომ აქ ჩამოსვლისას უსაფრთხო თავშესაფარს ეძებდა შვილისთვის, ახლა კი 6 500 დოლარის ღირებულების ტექნიკა მოპარეს, რომელსაც სამსახურისთვის იყენებდა.

უკრაინის მოქალაქე ამბობდა, რომ სამართალდამცავებს მიმართა, მაგრამ, ადგილზე მისულმა პოლიციამ არ შეამოწმა მანქანა და ჩვენება არ აიღო, მიზეზად კი უთხრეს, რომ რუსული ენის თარჯიმანი სჭირდებოდათ და მოგვიანებით დაუკავშირდებოდნენ. ქალი ამბობდა, რომ დახმარების იმედი დაკარგა და ინფორმაცია სოციალურ ქსელში გაავრცელა, რის შემდეგაც, გვიან ღამით მასთან ახალი ეკიპაჟი მივიდა. ჩვენთან საუბარში ელიზავეტა ამბობდა, რომ პოლიცია დილის 6 საათამდე ადგილზე იყო და დოკუმენტებს ადგენდნენ.