უკრაინულმა მხარემ ლავროვის პრეტენზიები მოლაპარაკებების შესახებ პროვოკაციად და კიევის პოზიციებზე ზეწოლის მცდელობად შეაფასა. პრეზიდენტის აპარატის უფროსის მრჩეველი მიხაილ პოდოლიაკი აცხადებს, რომ უკრაინული მხარე ომისა და მშვიდობის საკითხებს სისტემატიურად და პასუხისმგებლობით უდგება.

"მთავარი ის არის, რომ არსებობს უკრაინის მიერ შეთავაზებული უსაფრთხოების გარანტიის ფორმულა, მკაფიო, გააზრებული, დიდი რაოდენობის დამცველებით. ფუნდამენტური ცვლილებები ვერ იქნება. იურიდიული ქვეჯგუფები ამჟამად მუშაობენ ფორმულირების სიზუსტეზე და თანმიმდევრულობაზე, არაფერი მეტი.

ამიტომ, მოდით, უკრაინის ოფიციალურ პოზიციაზე გავამახვილოთ ყურადღება და არა რუსეთის ლიდერების პროვოკაციულ განცხადებებზე", — განუცხადა მან ჟურნალისტებს.

ლავროვის მტკიცებით, გუშინ უკრაინულმა მხარემ მოლაპარაკებების ჯგუფს წარუდგინა თავისი შეთანხმების პროექტი, რომელიც 29 მარტს სტამბოლში დაფიქსირებული ყველაზე მნიშვნელოვანი დებულებებიდან "გადახვევაა". მის განცხადებას პროკლემლისტური მედიები ავრცელებენ, სადაც აღნიშნულია, რომ უკრაინამ შეცვალა წვრთნების ჩატარების დებულება და აღარ ახსენებს, რომ ამისთვის აუცილებელი იქნება რუსეთის ხელისუფლების თანხმობა. მათი მტკიცებით, სტამბულის დოკუმენტში ცალსახად ნათქვამია, რომ "ნეიტრალური, არაბლოკური, არაბირთვული სტატუსის კონტექსტში, ნებისმიერი სამხედრო წვრთნები უცხოური კონტიგენტების მონაწილეობით ტარდება მხოლოდ გარანტორი სახელმწიფოს, მათ შორის რუსეთის, თანხმობით".

რამდენიმე უშედეგო, მათ შორის, რუსეთ-უკრაინის საგარეო საქმეთა მინისტრების შეხვედრის შემდეგ, შედარებით შედეგიანი მხოლოდ თურქეთში გამართული იყო. რეჯეფ თაიფ ერდოღანმა პირისპირ სასაუბროდ უკრაინის და რუსეთის პრეზიდენტები მიიწვია, თუმცა 29 მარტს სტამბულში ერთმანეთს დელეგაციები შეხვდნენ.

ამ ეტაპზე, მოლაპარაკებების მაგიდაზე რამდენიმე საკითხი დევს, მათ შორის, უკრაინის ნეიტრალიტეტი, ოკუპირებული ტერიტორიები და რუსეთის მიერ სამხედრო ოპერაციების შემცირება.