აქტივისტმა, სამირა ბაირამოვამ ალტ-ინფოს ოფისზე ანტიოკუპაციური წარწერები გააკრა. როგორც ბაირამოვა ფეისბუქგვერდზე გამოქვეყნებულ ვიდეოში ამბობს, "დღეიდან ცნობიერების ამაღლების კურსს იწყებს". მისივე თქმით, საზოგადოებას უნდა ასწავლოს, რომ რუსეთი ოკუპანტია.

"დღეიდან დავიწყე ცნობიერების ამაღლების კურსები. უნდა ვასწავლოთ საზოგადოებას, რომ რუსეთი ოკუპანტია. აი, მათი ჯვარი, მოვიტანე აქ. ყველამ უნდა იცოდეს, ყველას უნდა ახსოვდეს, რომ პუტინი და რუსეთი არის ოკუპანტი. იმედია, დაინახავენ ალტ-ინფოს წარმომადგენლები ამ სიას, ადამიანების ამ რაოდენობას, რომლებიც რუსეთმა მოკლა", — ამბობს ის.

წარწერების გარდა, აქტივისტმა ალტ-ინფოს ოფისზე პუტინის სისხლიანი გამოსახულება და გიორგი ანწუხელიძის ფოტო გააკრა, ასევე, კადრები აგვისტოს ომიდან.

სამირა ბაირამოვა აქტივისტია, რომელსაც მარნეულში ალტ-ინფოს ოფისზე ბანერი უკრაინისა და ევროკავშირის დროშის ფერებში შეღებვის გამო სიცოცხლის მოსპობით ემუქრებოდნენ. მან საგამოძიებო უწყებას იმავე დღეს მიმართა. შსს-მ გამოძიება სისხლის სამართლის 151-ე მუხლით დაიწყო, რაც სიცოცხლის მოსპობის ან ჯანმრთელობის დაზიანების მუქარას გულისხმობს.

20 მარტს ბაირამოვამ დაწერა, რომ ალტ-ინფომ პირველი მუქარა შეასრულა და მარნეულში ენმ-ის ოფისი შეღებეს. აქტივისტმა ფოტოები გამოაქვეყნა, სადაც ჩანს, რომ ენმ-ის ოფისზე შეურაცხმყოფელი წარწერებია გაკეთებული.

21 მარტს პარლამენტის თავმჯდომარემ, შალვა პაპუაშვილმა ბაირამოვასთან დაკავშირებით დასმულ შეკითხვაზე თქვა, რომ მუქარისა და ჰეითერული კამპანიის სამიზნე გამხდარა ყველა, ვინც სოციალურ ქსელში აქტიურია.