პარლამენტის თავმჯდომარის, შალვა პაპუაშვილის განცხადებით, სოციალურ ქსელში ყველა, ვინც არის აქტიური გამხდარა მუქარისა და ჰეითერული კამპანიის სამიზნე. ასე უპასუხა პაპუაშვილმა სამოქალაქო აქტივისტის სამირა ბაირამოვასთან დაკავშირებით დასმულ შეკითხვას. პარლამენტის თავმჯდომარემ სოლიდარობა გამოუცხადა ბაირამოვას და მოუწოდა ყველა ორგანოს რომ ეს საკითხი მალე გამოიძიონ.

"ყველანაირად სოლიდარობას ვუცხადებ სამირა ბაირამოვას, მას პირადადაც ვიცნობ. როგორც განათლების კომიტეტის თავმჯდომარეს მქონდა შესაძლებლობა მქონოდა შეხვედრა იმ თემებთან დაკავშირებით რითაც ის არის დაკავებული, ყველანაირად ვუცხადებ მას გვერდში დგომას და მოვუწოდებ სამართალდამცავ ორგანოებს, რომ ეს საკითხი მალე გამოიძიონ.

ამავე დროს მე როგორც ვიცი სოციალური ქსელის მეშვეობით იყო ეს მუქარები გაჟღებული. ზოგადად, ის რაც ხდება ქართულ სოციალურ ქსელში არის აბსოლუტურად მიუღებელი. განსაკუთრებით ეს შეეხება ხოლმე აქტიურ ადამიანებს. ნებისმიერი, მნიშვნელობა არ აქვს, არის ეს სამოქალაქო აქტივისტი, პოლიტიკოსი თუ, რომელი პოლიტიკური პარტიის წევრი, ყველა, ვინც კი არის აქტიური ყველა გამხდარა ამგვარი მუქარის და ჰეითერული კამპანიის სამიზნე. ამიტომ ესეც საკითხია, რომელზედაც ჩვენი საზოგადოება ზოგადად უნდა დაფიქრდეს ამაზე, რომ ის სიძულვილი რაც სოციალურ ქსელში არის ხოლმე ხშირად, რამენაირად შეიბოჭოს", — თქვა მან.

ალტ-ინფოს ოფისზე ბანერების შეღებვის შემდეგ სამირა ბაირამოვამ მუქარის შემცველი და შეურაცხმყოფელი შეტყობინებები მიიღო. მან საგამოძიებო უწყებას იმავე დღეს მიმართა. შსს-მ გამოძიება სისხლის სამართლის 151-ე მუხლით დაიწყო, რაც სიცოცხლის მოსპობის ან ჯანმრთელობის დაზიანების მუქარას გულისხმობს.

20 მარტს ბაირამოვამ დაწერა, რომ ალტ-ინფომ პირველი მუქარა შეასრულა და მარნეულში ენმ-ის ოფისი შეღებეს. აქტივისტმა ფოტოები გამოაქვეყნა, სადაც ჩანს, რომ ენმ-ის ოფისზე შეურაცხმყოფელი წარწერებია გაკეთებული.