ვახო ჟორჟოლიანს ამერიკული მუსიკა ბავშვობიდან შეუყვარდა. მუსიკალური ფილმი Crossroads მისთვის იმდენად შთამბეჭდავი აღმოჩნდა, რომ გიტარაზე და ჰარმონიკაზე დაკვრა თავად ისწავლა. დღეს ვახო ჟორჟოლიანი როგორც ისრაელში, ისე საქართველოში ბლუზის ერთ-ერთ გამორჩეულ შემსრულებლად ითვლება.

90-იანებში, როცა საქართველოში ეკონომიკური კრიზისი მძვინვარებდა, ვახოს ოჯახი საცხოვრებლად ისრაელში გადავიდა, თუმცა ვახო საქართველოში დარჩა, რათა კონსერვატორიაში გაეგრძელებინა სწავლა.

"რამდენადაც შესაძლებელი იყო პოსტსაბჭოთა საქართველოში მუსიკალური ინფორმაცია მოგვეგროვებინა, ვაგროვებდით, თუმცა მაინც არ გვყოფნიდა. მუსიკალურმა სკოლამ და კონსერვატორიამ მნიშვნელოვანი როლი შეასრულა ჩემს განვითარებაში. კონსერვატორიაში სწავლისას სულ ვცდილობდი, მეტი ადამიანისათვის გამეცნო ბლუზი. ბოლოს კონსერვატორიის რექტორმა დარბაზიც კი დაგვითმო კონცერტის ჩასატარებლად. პოსტსაბჭოთა სივრცის საგანმანათლებლო დაწესებულებისათვის ეს დიდი რევოლუცია იყო. დღეს კონსერვატორიაში ჯაზისა და ბლუზის ფაკულტეტია გახსნილი, რაც იმ დროისთვის აბსოლუტურად წარმოუდგენელი იყო. ვფიქრობ, რომ ამაში ჩემი წვლილიც არის".

კონსერვატორიის შემდეგ ვახომ სწავლა იერუსალიმის რუბინ აკადემიაში გააგრძელა; ჰქონდა კონცერტები და მუშაობდა ცნობილ მუსიკოსებთან ერთად. 2003 წელს აშშ-ში გაემგზავრა, კერძოდ კი — მისისიპიში: "წავედი გზაჯვარედინზე როუზდეილში, სადაც ლეგენდის მიხედვით, რობერტ ჯონსონმა სული გაყიდა, რათა ბოლომდე შეეგრძნო, რა არის ბლუზი". ვახოს თქმით, ყველა ბლუზმენმა იცის, ვინ არის რობერტ ჯონსონი და მის ჩანაწერებზე დღემდე იზრდებიან თაობები.

კადრი ფილმიდან Crossroads

ფოტო: Crossroads (1986)

აშშ-მ ვახოს ახალი შესაძლებლობები გაუჩინა: მუსიკოსმა მისისიპის შტატის ბლუზის რეგიონალურ კონკურსზე პირველი ადგილი მოიპოვა, რასაც მალევე მოჰყვა II ადგილი მსოფლიო ბლუზის კონკურსზე. გვერდიგვერ მუშაობდა ისეთ ცნობილ მუსიკოსებთან, როგორებიც არიან: დევიდ ლი დურჰამი, დევიდ ლი თომსონი და სხვები. ასევე, უკრავდა მორგან ფრიმანის ძალიან ცნობილ კლუბ "Ground Zero"-ში. მნიშვნელოვანი იყო ისიც, რომ 2004 წელს კლუბ "ებანიში" ბიბი კინგის დახვედრის ყოველწლიური ღონისძიება "BiBi King Coming Home" სწორედ ვახომ გახსნა. იმავე წელს მუსიკოსმა დელტა სთეით უნივერსიტეტშიც ჩააბარა.

გეგმები ისრაელში მომხდარი ტეროტისტული აქტის გამო აირია. დაშავებული მამის მოსანახულებლად ვახო ისრაელში, ოჯახთან დაბრუნდა. დღეს ის საქართველოში ცხოვრობს მეუღლესთან და ორ შვილთან ერთად და მისი ცხოვრება კვლავაც მუსიკასთანაა დაკავშირებული. სულ რამდენიმე დღის წინ ჯაზ კლუბ ზინგერში თავად გავხდი ვახოს არაჩვეულებრივი პერფორმანსის მომსწრე, დარბაზი ფეხზე წამოდგა და რამდენიმე წუთის განმავლობაში გაუჩერებლად უკრავდა ტაშს.

თუმცა, მისი ოცნება, რომ ამერიკაში ამერიკული ბლუზი დაუკრას, ჯერ კიდევ
ძალაშია...