24 თებერვალს რუსეთი უკრაინაში შეიჭრა და ომი დაიწყო, რომელიც დღემდე გრძელდება. უკრაინას მხარდაჭერა უამრავმა ცნობილმა ადამიანმა გამოუცხადა, რაც ხშირად ფინანსურ მხარდაჭერაშიც გამოიხატება. ერთ-ერთი მათგანი მსოფლიოს წამყვანი სუპერმოდელი ჯიჯი ჰადიდია.

ჯიჯიმ საკუთარ ინსტაგრამზე გულშემატკივრებს განუცხადა, რომ მოდის კვირეულის ჩვენებებიდან მიღებულ თანხას უკრაინის დასახმარებლად გამოიყენებს.

"მოდის სფეროში წინასწარ დაგეგმილი თვე იმას ნიშნავს, რომ მე და ჩემი კოლეგები ხშირად კოლექციებს სამწუხარო და ტრავმული მოვლენების მიმდინარეობის დროს წარვადგენთ. ჩვენ არ შეგვიძლია ჩვენი სამსახურის განრიგის შეცვლა, თუმცა გვინდა, რაღაც მიზანს ვემსახურებოდეთ... 2022 წლის შემოდგომის ჩვენებებიდან მიღებული შემოსავლით უკრაინის ომში დაზარალებულ ადამიანებს დავეხმარები...ომის ფასს უდანაშაულო ადამიანები იხდიან და არა — ლიდერები", — წერს ჯიჯი ინსტაგრამზე.

ეს პირველი შემთხვევა არაა, როცა მოდის სფეროს წარმომადგენლებმა უკრაინის მიმართ მხარდაჭერა გამოხატეს. ბალენსიაგას შემოქმედებითმა ხელმძღვანელმა დემნა გვასალიამ ჩვენება უკრაინას მიუძღვნა და აღნიშნა, რომ მიმდინარე მოვლენებმა საკუთარი წარსულიც გაახსენა.

"უკრაინაში მიმდინარე ომმა ჩემში იმ წარსული ტრავმის ტკივილი გააღვიძა, რომელიც 1993 წლიდან მომყვება — მას შემდეგ, რაც ჩემს ქვეყანაში იგივე მოხდა და მე სამუდამოდ ლტოლვილად ვიქეცი. სამუდამოდ იმიტომ, რომ ეს რაღაც ყოველთვის შენში რჩება. შიში, სასოწარკვეთილება და იმის გააზრება, რომ არავის სჭირდები. თუმცა, მე ისიც გავიაზრე, რა არის ცხოვრებაში მნიშვნელოვანი — ყველაზე მნიშვნელოვანი, როგორიცაა სიცოცხლე, ადამიანური სიყვარული და თანაგრძნობა", — განაცხადა დემნამ.

ამავე თემაზე:

უკრაინის ომმა ჩემში ის ტკივილი გააღვიძა, რომელიც 1993 წლიდან მომყვება — დემნა გვასალია