ენერგეტიკისა და წყალმომარაგების მარეგულირებელი კომისიის განცხადებით, არასწორი დარიცხვები დაკორექტირდა და ნახევარი მილიონი მოქალაქეებს სააბონენტო ბარათებზე დაუბრუნდათ.

მათივე თქმით, შემოწმების ჯგუფმა დამატებით 8254 მომხმარებლის მრიცხველების წაკითხვის შემთხვევაშიც გამოავლინა ხარვეზები.

"სემეკმა თელასისა და თელმიკოს საქმიანობების შემოწმება დაასრულა. შემოწმების შედეგად, დარღვევები გამოვლინდა თელასში, რომლებმაც 2021 წლის დეკემბერსა და 2022 წლის იანვარში მოქალაქეებზე ელექტროენერგიის გადასახადის არასწორი დარიცხვები განაპირობა. სემეკის გადაწყვეტილებით, თელასი სალიცენზიო პირობების დარღვევის გამო, სახელმწიფო ბიუჯეტის სასარგებლოდ 75 ათასი ლარით დაჯარიმდა", — ნათქვამია განცხადებაში.

კომისიის თქმით, შემოწმებით დადგინდა, რომ თელმიკოს დარიცხვები თელასის მიერ მოწოდებული არასწორი ინფორმაციით იყო გამოწვეული. ამასთან, სემეკში აღნიშნავენ, რომ თელასს დარღვევების აღმოსაფხვრელად ერთთვიანი ვადა მისცეს.

საქართველოს ენერგეტიკისა და წყალმომარაგების მარეგულირებელი კომისია მრიცხველების აღრიცხვის სისტემების ადგილზე შესასწავლად თელასსა და თელმიკოში პირველ დეკემბერს შევიდა.

იანვრის დასაწყისში მოქალაქეები სოციალურ ქსელში წერდნენ, რომ მათ არა მხოლოდ დენის გადასახადის ორი ქვითარი მიუვიდათ, არამედ გადასახადიც გაეზარდათ. 4 ნოემბერს საპასუხოდ, თელმიკოში განაცხადეს, რომ საახალწლო დღეებთან დაკავშირებით, 31 დეკემბერს, 1 და 2 იანვარს გამზადებული ქვითრები არ გაგზავნილა, შესაბამისად, აღნიშნული ქვითრები მომხმარებლებს 3 და 4 იანვარს გაუგზავნეს და ისინი დეკემბრის დარჩენილი დღეების ელექტროენერგიის ხარჯს ასახავდა.

კომპანიაში ამტკიცებდნენ იმასაც, რომ გავრცელებული ინფორმაცია 1 იანვრიდან ტარიფის გაზრდაზე სიმართლეს არ შეესაბამება და ელექტროენერგიის საფასური არ შეცვლილა.

სემეკის დირექტორმა, დავით ნარმანიამ 8 თებერვალს განცხადა, რომ ტარიფების ზრდა მოსალოდენლი არ არის.