24 თებერვალს რუსეთი უკრაინაში შეიჭრა და ომი დაიწყო. უკვე რამდენიმე დღეა, რაც უკრაინა მტრის შემოტევას იგერიებს, უკრაინელ ხალხსა და პრეზიდენტ ვოლოდიმირ ზელენსკის კი მხარდაჭერას თითქმის მთელი მსოფლიო ღიად უცხადებს. მათ შორის კულტურის სფეროს წარმომადგენლებიც არიან.

ამჯერად სოციალურ ქსელში უკრაინას მხარდაჭერა ცნობილი სერიალის, Friends-ის მსახიობმა დევიდ შვიმერმა გამოუცხადა. მან ინსტაგრამზე ვოლოდიმირ ზელენსკის ფოტო გამოაქვეყნა, სათაურით "აი, როგორ უნდა გაუძღვე ქვეყანას".

"ეს ვოლოდიმირ ზელენსკია, უკრაინის პრეზიდენტი. ის ებრაელია. ბაბუამისი მეორე მსოფლიო ომში ფაშისტებს ებრძოდა. მისი უამრავი ნათესავი ჰოლოკოსტს შეეწირა. ის დიქტატორს წინ აღუდგა, რადგან მამაცია და იცის, რა მოხდება, თუ ასე არ მოიქცევი", — ვკითხულობთ ფოტოზე.

გამოქვეყნებული ფოტოს აღწერაში დევიდ შვიმერმა გამომწერებს ისიც შეახსენა, რომ ზელენსკიმ კიევის დატოვებაზე უარი განაცხადა:

"უკრაინის პრეზიდენტ ვოლოდიმირ ზელენსკის აშშ-ის მთავრობამ კიევის დატოვება შესთავაზა, თუმცა მან უარი განაცხადა. ზელენსკიმ თქვა: "ტყვია-წამალი მჭირდება და არა — აქიდან წაყვანა".

მსახიობმა გამომწერებს უკრაინის მხარდაჭერისა და დახმარებისკენაც მოუწოდა და ამ მიზნით რამდენიმე ბმულიც გაუზიარა.

ამავე თემაზე:

ვინ არის ვოლოდიმირ ზელენსკი და რატომ შემორჩება ისტორიას გმირად