ჯანდაცვის მინისტრი მიხეილ სარჯველაძე 1-ელ ოქტომბერს ბათუმის რესპუბლიკურ საავადმყოფოში გამართულ ექიმ ჯუმბერ ბოლქვაძის მხარდამჭერ აქციას გამოეხმაურა. მისი თქმით, ბოლქვაძემ თანამდებობის დატოვების გადაწყვეტილება თავად მიიღო, ხოლო მისი მხრიდან პაციენტის მიღებაზე უარი უსაფუძვლო იყო, რადგან კლინიკაში ადგილები არსებობდა.

"მან თვითონ, ბატონმა ჯუმბერმა, მიიღო გადაწყვეტილება ისე, რომ არავის ეს მისგან არ მოუთხოვია. მოთხოვნა დადგებოდა საკითხის შესწავლის შედეგად, თუკი გაირკვეოდა, რომ კონკრეტულ ბრალეულ ქმედებასთან გვქონდა საქმე. მან დაასწრო მოვლენებს და თვითონ გვითხრა, რომ აპირებდა წასულიყო სამსახურიდან სექტემბრის ბოლოს. ამიტომ, ჩემთვის, სიმართლე გითხრათ, ცოტა მოულოდნელი იყო ის მოვლენების განვითარება, რომელიც გუშინ ვიხილეთ," — განაცხადა მიხეილ სარჯველაძემ.

სარჯველაძის განცხადებით, პაციენტისთვის საჭირო სამედიცინო დახმარებაზე უარის თქმა მიუღებელია და ფაქტი სამართლებრივ რეაგირებას საჭიროებს.

"ბათუმთან დაკავშირებით, ვითარება არის დაახლოებით ასეთი: ივნისის დასაწყისში, ბათუმის რესპუბლიკურ საავადმყოფოში ნაოპერაციებ 85 წლის ქალს ოპერაციის შემდგომი გართულების გასწორება დასჭირდა. სასწრაფო სამედიცინო დახმარების სამსახური დაუკავშირდა კლინიკას, თუმცა ბათუმის რესპუბლიკურ საავადმყოფოში ამ კონკრეტულმა თანამდებობის პირმა პაციენტის მიღებაზე, მიზეზის დაუკონკრეტებლად, განაცხადა უარი.

იმ წუთას ბათუმის საავადმყოფოში ადგილები იყო საკმარისი, როგორც ემერჯენსის განყოფილებაში, ისე რეანიმაციულ განყოფილებაში. ამის დასტურია ის, რომ როდესაც ჩავერიე მე პირადად და რამდენიმე ხელმძღვანელი პირი, მხოლოდ ამის შემდეგ აღმოჩნდა შესაძლებელი, იმავე დაწესებულებაში, ბათუმის რესპუბლიკურ საავადმყოფოში მიეღოთ პაციენტი. ოღონდ ამას დასჭირდა ძალიან დიდი ძალისხმევა, რადგან აბსოლუტურად უსაფუძვლოდ უარს ამბობდა ერთი კონკრეტული ექიმი პაციენტის მიღებაზე. ეს, რა საკვირველია, არის დარღვევა, რომელსაც აუცილებლად სჭირდება სამართლებრივი რეაგირება. ამ კონკრეტულმა თანამდებობის პირმა ბათუმის რესპუბლიკურ საავადმყოფოში უარი განაცხადა პაციენტის მიღებაზე, მიზეზის დაუკონკრეტებლად. აბსოლუტურად უმნიშვნელოა იქ, როგორ გააფორმა ეს ყველაფერი, რა მიუთითა. აქ არის მთავარი მომენტი: პაციენტისთვის საჭირო სამედიცინო დახმარებაზე, როდესაც ექიმი აცხადებს უარს, აბსოლუტურად მიუღებელია და ამას, ბუნებრივია, ყოველთვის შევეწინააღმდეგებით.

ასე რომ, რა თქმა უნდა, ბატონი ჯუმბერისთვის გასაგები იყო, რომ მას მოუწევდა ამაზე პასუხისმგებლობის აღება. მიზეზად დღეს იმის დასახელება, თითქოსდა ადგილები არ იყო, არის აბსოლუტური ტყუილი", — განაცხადა სარჯველაძემ.

1-ელ ოქტომბერს ბათუმის რესპუბლიკური საავადმყოფოს ექიმებმა გადაუდებელი დახმარების განყოფილების ხელმძღვანელის, ჯუმბერ ბოლქვაძის მხარდასაჭერად კლინიკის წინ აქცია გამართეს. მედიკოსები საქართველოსა და აჭარის ჯანდაცვის მინისტრების გადაწყვეტილებით ბოლქვაძის თანამდებობიდან გათავისუფლებას აპროტესტებდნენ.

როგორც სამედიცინო პერსონალი ამბობდა, საქმე ეხება თვეების წინანდელ ფაქტს, როდესაც კლინიკაში ადგილების არარსებობის გამო, პაციენტის მიღება ვერ მოხერხდა. ექიმების თქმით, ბოლქვაძის პასუხი სასწრაფო დახმარების ბრიგადისთვის — "მინისტრთან წაიყვანეთ" — მხოლოდ სიტყვის მასალა იყო და ამის გამო თანამდებობიდან გათავისუფლება უსამართლობაა.

ადგილზე შეკრებილები აცხადებდნენ, რომ ექიმმა სრული სიმართლე თქვა და ის, რომ კლინიკებში საწოლების რაოდენობა საკმარისი არ არის, ქართულ სამედიცინო სივრცეში სიახლე არაა.