საპარლამენტო ოპოზიციის განცხადებით, რუსეთის მიერ უკრაინაში შეჭრის ფონზე, საქართველოს ხელისუფლებისგან დუმილი და უმოქმედობა ჩანს, რაც ქვეყანას "სერიოზული ფასი" დაუჯდება.

ისინი პრეზიდენტ სალომე ზურაბიშვილს რიგგარეშე საპარლამენტო სხდომის მოწვევისკენ მოუწოდებენ. ოპოზიციის თქმით, ამავე სხდომაზე უკრაინის მხარდამჭერი რეზოლუცია უნდა იქნას მიღებული.

"ვითხოვთ და მივმართავთ საქართველოს პრეზიდენტს, რომ მოწვეულ იქნას რიგგარეშე პარლამენტის სხდომა, განსაზღვრული დღის წესრიგით და ეს დღის წესრიგი, ბუნებრივია, უნდა იყოს რუსეთის სამხედრო აგრესია უკრაინის წინააღმდეგ. ჩვენ, ასევე, ვთვლით, რომ პარლამენტის რიგგარეშე სხდომამ აუცილებლად უნდა მიიღოს რეზოლუცია და არა იმგვარი, არაფრისმთქმელი რეზოლუცია, სადაც სიტყვა რუსეთიც კი არ იყო ნახსენები, როგორიც მიიღო ქართულმა ოცნებამ ცოტახნის წინ, არამედ რეზოლუცია, რომელიც მათ შორის, ისაუბრებს სანქციებზე", — განაცხადეს მათ.

საპარლამენტო ოპოზიცია პრემიერმინისტრ ირაკლი ღარიბაშვილსაც მიმართავს და მოუწოდებს, რომ გაფართოებული ეროვნული უსაფრთხოების სხდომა მოიწვიოს.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს და მიზეზად ოკუპირებული დონეცკისა და ლუგანსკის სეპარატისტი ლიდერების "დახმარების თხოვნას" ასახელებს. ის ამტკიცებს, თითქოს ეს "ოპერაცია" არის თავდაცვა მათგან, ვინც "უკრაინა ტყვედ აიყვანა". ტრადიციულ პროპაგანდისტულ მოტივებზე პუტინი იმეორებს, რომ არ აპირებს უკრაინის ოკუპაციას და უკრაინელი ხალხის თვითგამორკვევის უფლებას უჭერს მხარს.

უკრაინის შინაგან საქმეთა მინისტრის მრჩევლის, ანტონ გონჩარენკოს განცხადებით, განხორციელდა სარაკეტო დარტყმები სამხედრო ადმინისტრაციის ცენტრებზე, აეროდრომებზე, სამხედრო საცავებზე, კიევთან, ხარკოვთან, დნეპრთან. მისივე თქმით, ხდება საზღვრის საარტილერიო დაბომბვა.

უკრაინის საგარეო საქმეთა მინისტრი, დმიტრი კულება აცხადებს, რომ რუსეთმა მათ წინააღმდეგ სრულმასშტაბიანი ომი დაიწყო და მშვიდობიან ქალაქები იბომბება. მისი თქმით, უკრაინა თავს დაიცავს და მსოფლიომ პუტინი ახლავე უნდა შეაჩეროს.

უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა. მან მოუწოდა ხალხს, არ აყვნენ პანიკას. მისი თქმით, ყველაფრისთვის მზად არიან და ყველას დაამარცხებენ.

გაიგეთ მეტი: