ამერიკის შეერთებული შტატების ელჩი საქართველოში, კელი დეგნანი აცხადებს, რომ ახლა აშშ უფრო მეტად დგას საქართველოსა და ქართველი ხალხის გვერდით, ვიდრე ოდესმე.

"ახლა მეტად, ვიდრე ოდესმე, აშშ საქართველოსა და ქართველი ხალხის გვერდით იდგება, მხარს დაუჭერს საქართველოს სუვერენიტეტს, ტერიტორიულ მთლიანობას და ერთად იმუშავებს იმ მომავლისთვის, რომელიც ქართველებს სურთ", — აცხადებს ელჩი.

მისივე თქმით, ქვეყანა მოკავშირეებსა და პარტნიორებთან ერთად სტაბილურობისა და უსაფრთხოების გაუმჯობესებაზე მუშაობს, რაც საქართველოს მთავრობასთან ახლო თანამშრომლობას მოიცავს.

"მინდა ვთქვა, რა მოვისმინე ვაშინგტონში რუსეთის აგრესიული ქმედებების შედეგად შექმნილი უსაფრთხოების კრიზისის შესახებ. პრეზიდენტი ბაიდენი, სახელმწიფო მდივანი ბლინკენი, ყველა ორიენტირებულია მშვიდობიანი და დიპლომატიური გამოსავლის ძიებაზე. ეს აშშ-ის მთავარ პრიორიტეტად რჩება. ამავე დროს, ვაცნობიერებთ, რომ უარესისთვის უნდა ვიყოთ მზად. მოკავშირეებსა და პარტნიორებთან ერთად ვმუშაობთ, რათა ევროპის სტაბილურობა და უსაფრთხოება გაიზარდოს. ეს მოიცავს საქართველოს მთავრობასთან ახლო თანამშრომლობას", — ამბობს ელჩი.

რუსეთის პრეზიდენტმა, ვლადიმერ პუტინმა უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარა. პუტინმა ეს გადწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჯღერა. მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.

პუტინის გადწყვეტილება მინსკის შეთანხმების უხეში დარღვევაა, რასაც უკვე გამოეხმაურენ მსოფლიო ლიდერები. ეს ქმედება დაგმო საქართველომაც.

აღიარების შემდეგ პუტინმა უკრაინის ტერიტორიაზე ჯარები გაგზავნა, მოტივად კი ისევ "სამშვიდობო მისია" დაასახელა. პუტინი ბრძანებაში ამტკიცებს, თითქოს უკრაინის ორი რეგიონის "დამოუკიდებლობა" კონფლიქტის მშვიდობიანი რეგულირებისა და მინსკის შეთანხმების გათვალისწინებით აღიარა.

დოკუმენტში ასევე ვკითხულობთ, რომ რუსეთს საგარეო საქმეთა სამინისტორს დაევალა, დონეცკისა და ლუგანსკის "მთავრობებთან" მოამზადოს მეგობრობის და ორმხრივი ურთიერთობების შეთანხმება. პუტინის ბრძანების მიხედვით, დონეცკისა და ლუგანსკის "მმართველების" მიმართვის საფუძველზე, შეთანხმების დადებამდე "სამშვიდობო მისიით" გაგაზავნიან ჯარებს.