კიევში აშშ-ის საელჩომ უკრაინაში მყოფ თანამოქალაქეებს საჰაერო თავდასხმის განგაშის გამოცხადებისას სიფრთხილის გამოჩენისა და თავშესაფრის ძიების აუცილებლობის შესახებ გააფრთხილა. შესაბამისი განცხადება ამერიკის საელჩოს ვებგვერდზე გამოქვეყნდა.

"რუსეთმა ბოლო კვირების განმავლობაში გაზარდა უკრაინის წინააღმდეგ სარაკეტო და დრონებით თავდასხმების ინტენსივობა და ამ დროისთვისაც მნიშვნელოვანი საჰაერო თავდასხმების რისკი კვლავ არსებობს. კიევში აშშ-ის საელჩო აშშ-ის მოქალაქეებს სათანადო სიფრთხილისკენ მოუწოდებს", — ნათქვამია განცხადებაში.

განცხადებაში წერია, რომ უკრაინაში მყოფ მოქალაქეებს ურჩიეს, საჰაერო თავდასხმის განგაშის გამოცხადებისას ფანჯრებთან ახლოს არ დადგნენ, წინასწარ აირჩიონ თავშესაფარი და ადგილობრივი მედიის სიახლეები აკონტროლონ.

"ნებისმიერი საჰაერო განგაშის გამოცხადებისას განსაზღვრეთ გქონდეთ განსაზღვრული ადგილები.

ჩამოტვირთეთ საიმედო საჰაერო განგაშის აპლიკაცია თქვენს მობილურ ტელეფონში, როგორიცაა AirRaid Siren ან Alarm Map.

თავშესაფარში ფანჯრებისგან მოშორებით დაიკავეთ ადგილი, თუ საჰაერო განგაში გამოცხადდება.

აკონტროლეთ ადგილობრივი მედია სიახლეები.

შეინახეთ წყლის, საკვების და მედიკამენტების მარაგი.

საგანგებო სიტუაციის შემთხვევაში დაიცავით უკრაინელი ოფიციალური პირებისა და პირველი რეაგირების ჯგუფების მითითებები.

გადახედეთ, რა შეუძლია და რა არ შეუძლია სახელმწიფო დეპარტამენტს კრიზისის დროს", — ნათქვამია განცხადებაში.

ამ განცხადების გავრცელებამდე აშშ-ს პრეზიდენტი დონალდ ტრამპი ტელეფონით ესაუბრა რუსეთის პრეზიდენტ ვლადიმერ პუტინს. მისი თქმით, ამ საუბრის დროს "პრეზიდენტმა პუტინმა ძალიან გადამწყვეტად თქვა, რომ ის აეროდრომებზე ბოლო დროს განხორციელებულ თავდასხმას უპასუხებს".