1-ლი ივლისიდან "საინფორმაციო ცენტრის ნატოსა და ევროკავშირის შესახებ" ლიკვიდაცია იგეგმება — ამ მიზეზით "საინფორმაციო ცენტრის ნატოსა და ევროკავშირის შესახებ" ქვემო ქართლის რეგიონის წარმომადგენელი თემურ სუყაშვილი სამსახურიდან გაათავისუფლეს.

ინფორმაციას თავად თემურ სუყაშვილი ავრცელებს და წერილს აქვეყნებს, სადაც წერია, რომ ოცნების ხელისუფლების საგარეო საქმეთა მინისტრის, ხათუნა თოთლაძის 2025 წლის 29 მაისის მოხსენებითი ბარათის საფუძველზე, 2025 წლის 1-ელი ივლისიდან იგეგმება საჯარო სამართლის იურიდიული პირის — "საინფორმაციო ცენტრის ნატოსა და ევროკავშირის შესახებ" ლიკვიდაცია და, აღნიშნულიდან გათვალისწინებით, ერთი თვით ადრე აფრთხილებენ სამსახურიდან გათავისუფლების შესახებ.

"ჩვენი ქვეყნის და პარტიის მორიგი უბადლო წარმატება. ევროკავშირსა და ნატოში გაწევრიანების გზაზე მიღწეული წარმატების შემდეგ, უკვე

"საინფორმაციო ცენტრი ნატოსა და ევროკავშირის შესახებ" საჭირო აღარაა. აქამდე ლიკვიდაცია მაღაზიების დახურვისას ცხადდებოდა ხოლმე და იქიდან ვიცოდი...

ახლა ცოტა სერიოზულად. ამ ძვირფას საქმეს 6 წელი ვემსახურე. ამ დროის მანძილზე ქვემო ქართლის 100-ზე მეტ სოფელსა თუ მუნიციპალურ ცენტრს ვესტუმრე (რუსთავი, გარდაბანი, ბოლნისი, მარნეული, დმანისი, წალკა, თეთრიწყარო — ნატოსა და ევროკავშირის შესახებ ცნობიერების ამაღლების მიზნით ჯამში 300-მდე შეხვედრა მაქვს ჩატარებული).

პირადად მე, თემურ სუყაშვილი, არც ამ განთავისუფლებით დავიქცევი და მომავალში მოსალოდნელ რისკებსაც ასე თუ ისე კარგად ვაცნობიერებ, წინასწარ ვემზადები მენტალურად და ემოციურად.

ერთი მხრივ, ჩვენი ქვეყანა და მეორე მხრივ, ჩვენი შვილები მადარდებს", — წერს თემურ სუყაშვილი და წერილს აქვეყნებს.

საგარეო უწყებას ოფიციალური ინფორმაცია "საინფორმაციო ცენტრის ნატოსა და ევროკავშირის შესახებ" ლიკვიდაციის შესახებ არ გაუვრცელებია.

მეტი საგარეო უწყებაში დაგეგმილი რეორგანიზაციის შესახებ: