გაეროს 79-ე ასამბლეაზე საქართველოს ტერიტორიული მთლიანობის მხარდამჭერი რეზოლუცია მიიღეს, რომელიც ოკუპირებულ ტერიტორიებში მცხოვრები დევნილების თავიანთ სახლებში დაბრუნების უფლებას აღიარებს. რეზოლუციის მხარდამჭერებს შორის არ იყო საქართველოს სტრატეგიული პარტნიორი ჩინეთი, ასევე — საუდის არაბეთი.

რეზოლუციას მხარი არ დაუჭირა 9 ქვეყანამ, მათ შორის რუსეთმა და ბელარუსმა; თავი შეიკავა — 49-მა ქვეყანამ, მათ შორის — საქართველოს სტრატეგიულმა პარტნიორმა ჩინეთმა, ასევე — საუდის არაბეთმა, ირანმა, ინდოეთმა, ისრაელმა, ყაზახეთმა, ყირგიზეთმა, უზბეკეთმა, სირიამ, ჩრდილოეთ კორეამ.

კენჭისყრის შედეგები

კენჭისყრის შედეგები

საერთაშორისო ურთიერთობათა სპეციალისტი, გიორგი ტუმასიანი წერს, რომ "გლობალური ომის პარტიობა" და "დიფ სთეითობა" ვისაც დააბრალეს, ყველამ მხარი დაუჭირა [გაეროში] ჩვენი დევნილების დაბრუნების რეზოლუციას წელსაც. ყველა ვინც "დიფ სთეითს" ებრძვის — რუსეთი, ბელარუსი, ჩრდილოეთ კორეა და ა.შ. წინააღმდეგია“.

"მხარი არ დაუჭერია ჩვენს ახალ ვითომ "სტრატეგიულ მოკავშირეს" კომუნისტურ ჩინეთს. არც არაბთა გაერთიანებულ საამიროებს (ვისაც ტურიზმის მსოფლიო ორგანიზაციის გენმდივნის თანამდებობა ვაჩუქეთ და თბილისთან და ბათუმთან უდიდეს მიწებს გადავცემთ), არც ირანს (სადაც ჰეზბოლას და ჰამასის გვერდით იდგნენ პანაშვიდზე "სიკვდილი ამერიკას, სიკვდილი ისრაელს" დაძახებისას), არც ყაზახეთს, უზბეკეთს, თურქმენეთს და ყირგიზეთს (სადაც დაუღალავად ჩადიან და თემურ ლენგის საფლავიც კი ყვავილებით შეამკეს).

ისე, ბელარუსიც ჩვენი მოკავშირეა და საერთოდ წინააღმდეგ მისცა ხმა. არ გჯერათ? სუსის და ბელარუსის კგბ-ს თანამშრომლობის დოკუმენტს მოეწერა ხელი 2021 წელს.

მტერი მოყვარეა, მოყვარე მტერია. გატყუებთ და მოგატყუებთო სადამდეც გაგვივაო.

პ.ს. ჩვენი დევნილები კი აუცილებლად დაბრუნდებიან თავიანთ სახლებში, მაგრამ მანამდე 80% განთავისუფლება უნდა მოხდეს ჯერ", — წერს ტუმასიანი.