პედრო პასკალმა, არიანა გრანდემ, დუა ლიპამ და დენიელ რედკლიფმა, ხელი მოაწერეს ღია წერილს, რომელიც მიმართულია აშშ-ის მთავრობისადმი. წერილში 100-ზე მეტი ცნობილი ადამიანი მთავრობას მოუწოდებს, არ შეწყვიტონ $50 მილიონის რაოდენობის დაფინანსება 988 Suicide & Crisis Lifeline-ისთვის, რომელიც ლგბტ+ ახალგაზრდებში სუიციდის პრევენციაზე ზრუნავს.

წერილი მას შემდეგ გამოქვეყნდა, რაც გავრცელდა ინფორმაცია, რომ აშშ-ის ჯანდაცვისა და სოციალური მომსახურების დეპარტამენტის ბიუჯეტის პროექტში გათვალისწინებულია ამ დაფინანსების შეწყვეტა.

"ჩვენ, როგორც არტისტებს, შემოქმედებსა და ცნობილ პირებს, პასუხისმგებლობა გაგვაჩნია. დღეს ეს პასუხისმგებლობა სრულიად ნათელია: უნდა ვთქვათ ჩვენი სათქმელი, რათა დავიცვათ ლგბტქ+ ახალგაზრდების მენტალური ჯანმრთელობა და სიცოცხლე," — ვკითხულობთ წერილში — "ჩვენ ჩუმად არ დავრჩებით."

წერილში ასევე აღნიშნულია, რომ პროგრამა 988, რომელიც 2022 წელს ამოქმედდა,
დაარსებიდან თითქმის 1.3 მილიონ კრიზისულ სიტუაციაში მყოფ ახალგაზრდას დაეხმარა და ისინი სიცოცხლის გადამრჩენ, მხარდამჭერ სერვისებთან ყველაზე დაუცველ მომენტებში დააკავშირა. "თვითმკვლელობა ლგბტქ+ ახალგაზრდებში წარმოადგენს საზოგადოებრივი ჯანდაცვის კრიზისს და სახელმწიფოს რეაგირებაც სწორედ ასეთი უნდა იყოს."

წერილში ხაზგასმულია, რომ ლგბტქ+ ახალგაზრდები ოთხჯერ უფრო ხშირად ცდილობენ სუიციდს, ვიდრე მათი ჰეტეროსექსუალური თანატოლები. წერილის ავტორები აღნიშნავენ, რომ ეს საკითხი პოლიტიკას სცდება და ეხება ადამიანების სიცოცხლესა და ჯანმრთელობას.

წერილი მოწოდებით სრულდება: "ჩვენ ერთად ვდგავართ იმედისთვის, ღირსებისთვის და იმისთვის, რომ თითოეულმა ლგბტქ+ ახალგაზრდამ იცოდეს, რომ მათი სიცოცხლე ფასეულია და ყოველთვის იქნება ვინმე, ვინც მათ მოუსმენს."