თბილისის საქალაქო სასამართლოში, აქტივისტ ალბი კორძაიას თეა წულუკიანის შეურაცხყოფის ბრალდებით 10-დღიანი პატიმრობა შეეფარდა. გადაწყვეტილება მოსამართლე მანუჩარ ცაცუამ მიიღო.

ალბი კორძაიას 11 აპრილს მომხდარ ინციდენტს ედავებიან, როდესაც მან თეა წულუკიანს სახლთან ხმის გამაძლიერებლით "რუსეთის მონას" და "ქვეყნის მოღალატეს" სკანდირებდა. აქტივისტების თეა წულუკიანის სახლთან მას შემდეგ შეიკრიბნენ, რაც ოცნების ვიცე-სპიკერმა დროებით საგამოძიებო კომისიაზე გიორგი ანწუხელიძეს "უაზროდ გაწირული ვიღაცის პიარისთვის" უწოდა.

• თეა წულუკიანი ანწუხელიძეზე: "უაზროდ გაწირული ვიღაცის პიარისთვის"

პუბლიკას ინფორმაციით, შინაგან საქმეთა სამინისტროს განცხადებით აქტივისტის ამ ქმედებამ არა მხოლოდ თეა წულუკიანს, არამედ მისი მცირეწლოვანი შვილიც და მეზობლებიც შეწუხდნენ.

"საღამოს საათებში ხდებოდა აღნიშნული მოქმედება, ისეთ დროს, როდესაც ადამიანები ისვენებენ — შაბათს, დასვენების დღეს და აგრეთვე ინფორმაციის სახით გაწოდებთ, რომ ქალბატონი თეა არ ცხოვრობს ამ სახლში მარტო, ის ცხოვრობს ოჯახთან ერთად, ჰყავს მცირეწლოვანი შვილი და შესაბამისად, თავის მხრივ, შეიძლება ადამიანს პროტესტის გამოხატვა გსურდეს, მაგრამ დიდი მნიშვნელობა აქვს სად, რა ფორმით და როგორ გამოხატავ.

ოჯახის წევრებს ნამდვილად არ აქვთ და მათ შორის, არც ქალბატონ თეას, იმგვარი თმენის ვალდებულება, რომ ამგვარი მოქმედება მათთვის ნორმალური ან ჩვეული უნდა იყოს - მინიმუმ, ბავშვის საუკეთესო ინტერესებიდან გამომდინარე. ის, თუ რას საქმიანობს მშობელი, ნამდვილად არ უნდა ეხებოდეს მცირეწლოვან ბავშვს, მის ფსიქიკას. შესაბამისად, აღნიშნული მოქმედება ნამდვილად არ იყო მცირე მნიშვნელობის და აქედან გამომდინარე, ვითხოვთ პატიმრობის გამოყენებას," — თქვა შსს-ს წარმომადგენელმა.

შეგახსენებთ, ლიკა ლორთქიფანიძეს და თათია აფრიამაშვილს 12-დღიანი პატიმრობა შეეფარდა. მაგდა მამუკაშვილს კი 4000-ლარიანი ჯარიმა დააკისრეს. სამივე აქტივისტს ქართული ოცნების დეპუტატი, მარიამ ლაშხი შეურაცხყოფისთვის ედავებოდა.

17 მაისს, ქართული ოცნების დეპუტატ მარიამ ლაშხთან აქტივისტები მივიდნენ და "თავისუფლება რეჟიმის ტყვეებს!", "არა რუსულ რეჟიმს!" და "არა რუსეთის მონებს!" სკანდირებდნენ. ინციდენტის ამსახველი კადრები თათია აფრიამაშვილმა სოციალურ ქსელში გამოაქვეყნა.

• 19-20 წლის აქტივისტ ქალებს, რომელთაც მარიამ ლაშხმა შეურაცხყოფისთვის უჩივლა, 12-დღიანი პატიმრობა მიესაჯათ

ადმინისტრაციულ სამართალდარღვევათა კოდექსში თებერვალში შესული ცვლილებით, საქართველოს სახელმწიფო-პოლიტიკური თანამდებობის პირის სიტყვიერი შეურაცხყოფა, ლანძღვა-გინება, შეურაცხმყოფელი გადაკიდება ან/და სხვაგვარი შეურაცხმყოფელი ქმედების განხორციელება სამსახურებრივი მოვალეობის შესრულების დროს ან სამსახურებრივი მოვალეობის შესრულებასთან ან საქმიანობასთან დაკავშირებით გამოიწვევს დაჯარიმებას 1500 ლარიდან 4000 ლარამდე ოდენობით ან ადმინისტრაციულ პატიმრობას 45 დღემდე ვადით.