აშშ-სა და რუსეთის პრეზიდენტებს ოთხშაბათს საღამოს სატელეფონო საუბარი ჰქონდათ. დონალდ ტრამპმა განაცხადა, რომ "ეს კარგი საუბარი იყო, მაგრამ არა ისეთი, რომელიც მიგვიყვანს მყისიერ მშვიდობამდე.

მისივე თქმით, "პრეზიდენტმა პუტინმა ძალიან გადამწყვეტად თქვა, რომ ის აეროდრომებზე ბოლო დროს განხორციელებულ თავდასხმას უპასუხებს", — თქვა ტრამპმა.

"ახლახან დავასრულე რუსეთის პრეზიდენტ ვლადიმერ პუტინთან ტელეფონით საუბარი. სატელეფონო საუბარი დაახლოებით ერთ საათსა და 15 წუთს გაგრძელდა. ჩვენ განვიხილეთ უკრაინის მიერ რუსეთის თვითმფრინავებზე თავდასხმა და ასევე ორივე მხარის მიერ განხორციელებული სხვადასხვა თავდასხმები. ეს იყო კარგი საუბარი, მაგრამ არა ისეთი საუბარი, რომელიც დაუყოვნებლივ მშვიდობამდე მიგვიყვანდა. პრეზიდენტმა პუტინმა ძალიან მკაცრად განაცხადა, რომ მას მოუწევს აეროდრომებზე ბოლო დროს განხორციელებულ თავდასხმაზე რეაგირება. ჩვენ ასევე ვისაუბრეთ ირანზე და იმ ფაქტზე, რომ ირანის მიერ ბირთვულ იარაღთან დაკავშირებით გადაწყვეტილების მიღების დრო იწურება. მე ვუთხარი პრეზიდენტ პუტინს, რომ ირანს არ შეიძლება ჰქონდეს ბირთვული იარაღი და, მე მჯერა, რომ ამ საკითხზე ჩვენ შევთანხმდით. პრეზიდენტმა პუტინმა შემომთავაზა, რომ მონაწილეობას მიიღებდა ირანთან მოლაპარაკებებში და შესაძლოა, მას შეუძლია დახმარება ამ საკითხის სწრაფად დასრულებაში. ჩემი აზრით, ირანი ამ ძალიან მნიშვნელოვან საკითხზე გადაწყვეტილების მიღებას აფერხებს და ჩვენ ძალიან მოკლე დროში დაგვჭირდება საბოლოო პასუხი!", — წერს ტრამპი სოციალურ ქსელში.

როგორც Euronews იუწყება, რუსეთის პრეზიდენტის თანაშემწემ იური უშაკოვმა განაცხადა, რომ ვლადიმერ პუტინმა და დონალდ ტრამპმა „რუსეთ-ამერიკული თანამშრომლობის აღდგენა სხვადასხვა სფეროში“. რუსული საინფორმაციო სააგენტოები უშაკოვის სიტყვებს ციტირებენ.

"პრეზიდენტებმა გაცვალეს მოსაზრებები რუსეთ-ამერიკული თანამშრომლობის აღდგენის პერსპექტივებზე სხვადასხვა სფეროში, რომელსაც, ორი პრეზიდენტის თქმით, უზარმაზარი პოტენციალი აქვს", — თქვა უშაკოვმა.

რუსეთის პრეზიდენტის თანაშემწემ ჟურნალისტებს ასევე განუცხადა, რომ დონალდ ტრამპი მიიჩნევს, რომ აშშ-სა და ირანს შორის ირანის ბირთვულ პროგრამაზე მოლაპარაკებებში „რუსეთის დახმარება შეიძლება საჭირო გახდეს და ის მადლიერი იქნებოდა, თუ რუსეთი შესაბამისად ითანამშრომლებდა ირანულ მხარესთან“.

"ლიდერები შეთანხმდნენ, რომ გააგრძელებენ კონტაქტებს უკრაინის საკითხზე, მათ შორის უმაღლეს დონეზე, ასევე სხვა დონეებზე და სხვა არხებით", — თქვა უშაკოვმა.

რუსეთის სტრატეგიულ ავიაციაზე უკრაინული დრონების თავდასხმის კომენტირებისას უშაკოვმა თქვა: "ეს თემა მართლაც განიხილეს. მე უკვე ვთქვი ის, რაც შემეძლო ამ თემაზე. ტრამპმა კატეგორიულად ხაზგასმით აღნიშნა, რომ ამერიკულ მხარეს ამის შესახებ წინასწარ არ აცნობეს უკრაინის შესაბამისმა ორგანოებმა".

ოთხშაბათს, პუტინმა მთავრობის მინისტრებთან ბრიფინგი გამართა, სადაც მან უკრაინის ხელისუფლება "ტერორიზმში" დაადანაშაულა და მოლაპარაკებების შეწყვეტით დაემუქრა.

პუტინმა არ ახსენა უკრაინის გაბედული ოპერაცია რუსეთის სამხედრო აეროდრომების წინააღმდეგ, მხოლოდ კურსკისა და ბრიანსკის რეგიონებში ხიდების აფეთქებაზე გაამახვილა ყურადღება.

"ეს, რა თქმა უნდა, ტერორისტული აქტია. და ასეთი დანაშაულების ჩადენის გადაწყვეტილებები, რა თქმა უნდა, უკრაინაში პოლიტიკურ დონეზე იქნა მიღებული", — თქვა მან.

პუტინმა ასევე ნათლად განაცხადა, რომ არ აპირებს ცეცხლის შეწყვეტას, როგორც ამას უკრაინა და მისი მოკავშირეები ამტკიცებენ.

"რაზეა საუბარი? როგორ შეიძლება მოლაპარაკება მათთან, ვინც ტერორზეა გადასული?" — თქვა მან.

ორშაბათს, სტამბოლში უკრაინასა და რუსეთს შორის მოლაპარაკებების მეორე რაუნდი გაიმართა, რომლის დროსაც მნიშვნელოვანი წინსვლა არ მომხდარა მდგრადი ცეცხლის შეწყვეტის გზაზე, თუმცა, ორივე მხარე შეთანხმდა პატიმართა გაცვლაზე.

სტამბოლში გამართული მოლაპარაკებების დროს, უკრაინამ მოსკოვის ოფიციალურ პირებს ასევე გადასცა რუსეთის მიერ იძულებით დეპორტირებული ასობით უკრაინელი ბავშვის სია.

• რას ითხოვს რუსეთის უკრაინაში ომის დასასრულებლად? — რა შედეგით დასრულდა რუსეთ-უკრაინის მოლაპარაკების მეორე რაუნდი