ოკუპირებული აფხაზეთის დე ფაქტო რეჟიმი დონბასელ სეპარატისტებს "სამხედრო და ჰუმანიტარულ დახმარებას" სთავაზობს. ე.წ. პრეზიდენტის, ასლან ბჟანიას განცხადებით, ამას გააკეთებენ თუ საჭირო იქნება.

ბჟანიას განცხადება კრემლის პროპაგანდას ატარებს და ის ამტკიცებს, თითქოს სიტუაციას "დასავლელი კურატორების მიერ წაქეზებული" უკრაინა ძაბავს. მისი თქმით, მუდმივ კავშირზე არიან თვითაღიარებული დონეცკისა და ლუგანსკის ე.წ. სახალხო რესპუბლიკების ლიდერებთან.

18 თებერვალს დონეცკისა და ლუგანსკის თვითგამოცხადებული რესპუბლიკების ლიდერებმა მოსახლეობას ევაკუაციისკენ მოუწოდეს. ისინი ამტკიცებდნენ, თითქოს ზელენსკის ბრძანებით უკრაინის ჯარი თავდასხმას აპირებდა. უკრაინის სამხედრო ძალების მეთაურმა ოკუპირებული ტერიტორიების მაცხოვრებლებს მიმართა და ეს ცნობები უარყო. ამ ცნობებს სიცრუე უწოდა ზელენსკის ოფისმაც. როგორც მათ აღნიშნეს, რუსეთი ყველანაირად ცდილობს მათ პროცოცირებას.

თვითაღიარებულმა ლიდერებმა კი მოუწოდეს ადგილობრივებს, რუსეთის ტერიტორიაზე გადასულიყვნენ. მოგვიანებით ცნობილი გახდა, რომ რუსეთი ამ დასახლებიდან "დევნილებს" ერთჯერადად 10 000 რუბლს გადაუხდის.

უკრაინის საგარეო საქმეთა სამინისტრო აცხადებს, რომ სიმართლეს არ შეესაბამება გავრცელებული ცნობები, დონეცკსა და ლუგანსკზე შეტევის შესახებ. მათივე თქმით, სიცრუეა ისიც, რომ დონბასში დივერსია იგეგმება.