დიდი შვიდეულის ქვეყნების — კანადის, საფრანგეთის, გერმანიის, იტალიის, იაპონიის, გაერთიანებული სამეფოსა და ამერიკის შეერთებული შტატების საგარეო საქმეთა მინისტრები უკრაინის მხარდამჭერ საერთო განცხადებას ავრცელებენ. ისინი რუსეთს სიტუაციის განმუხტვისა და რეალური დეესკალაციისკენ მოუწოდებენ. მათივე თქმით, ამ დრომდე, ამის მტკიცებულებას ვერ ხედავენ.

"კვლავ შეშფოთებულები ვართ რუსეთის მუქარით უკრაინის გარშემო, ანექსირებულ ყირიმსა და ბელარუსში რუსეთის სამხედრო ძალების სახიფათოდ განლაგების გამო. ცივი ომის დასრულების შემდეგ ევროპის კონტინენტზე რუსეთის მიერ არაპროპორციული და გაუმართლებელი მასობრივი სამხედრო ძალების ყველაზე დიდი განლაგება გლობალური უსაფრთხოებისა და საერთაშორისო წესრიგისთვის უდიდესი გამოწვევაა.

მოვუწოდებთ რუსეთს, აირჩიონ დიპლომატიის გზა, განიმუხტოს დაძაბულობა, გადაიყვანოს სამხედრო ძალები უკრაინის საზღვრებიდან და სრულად დაიცვას საერთაშორისო ვალდებულებები, მათ შორის, რისკის შემცირებისა და სამხედრო აქტივობების გამჭირვალობის შესახებ. პირველ ნაბიჯად ჩვენ რუსეთისგან ველით, რომ უკრაინის საზღვრებთან სამხედრო აქტივობების შემცირებაზე განცხადებას სისრულეში მოიყვანენ. ჩვენ ამის მტკიცებულება ვერ ვნახეთ, ჩვენ რუსეთს მისი საქმეების მიხედვით განვსჯით", — ვკითხულობთ განცხადებაში.

ისინი აღნიშნავენ, რომ სახელმწიფოთა ტერიტორიული მთლიანობისა და სუვერენიტეტის წინააღმდეგ ნებისმიერი მუქარა და ძალის გამოყენება საერთაშორისო წესრიგს, ევროპული მშვიდობასა და უსაფრთხოების წესრიგს ეწინააღმდეგება, რომელიც ჰელსინკის დასკვნით აქტში, პარიზის ქარტიასა და სხვებშია გათვალისწინებული. ისინი რუსეთთან დიპლომატიური დიალოგის მზაობას გამოთქვამენ, თუმცა აღნიშნავენ, რომ უკრაინის წინააღმდეგ სამხედრო აგრესიის შემთხვევაში რუსეთი მძიმე შედეგების წინაშე აღმოჩნდება.

"რუსეთს ეჭვი არ უნდა ეპარებოდეს, რომ უკრაინის წინააღმდეგ შემდგომ სამხედრო აგრესიას მძიმე შედეგები, მათ შორის, სექტორულთან ერთად ინდივიდუალური ფინანსური და ეკონომიკური სანქციები მოჰყვება, რასაც რუსეთის ეკონომიკისთვის მძიმე და უპრეცედენტო ფასი იქნება", — ამბობენ ისინი.

დიპლომატების თქმით, ბოლო დღეებში ცეცხლის შეწყვეტის შესახებ შეთანხმების დარღვევების შემთხვევები ყოველდღიურად მატულობს. ისინი მძიმე შეიარაღებული ძალების გამოყენებასა და სამოქალაქო ტერიტორიების დაბომბვას გმობენ და მას მინსკის შეთანხმების დარღვევად აფასებენ. მათი თქმით, განსაკუთრებით შემაშფოთებელია თვითგამოცხადებულ რესპუბლიკების მიერ მიღებული ზომები და მიაჩნიათ, რომ ეს "ინსცენირებული ინციდენტები" სამხედრო ესკალაციის საფუძვლად უნდა ჩაითვალოს.

G7 ქვეყნებმა ეუთოს სპეციალური სადამკვირვებლო მისიის მიმართ მტკიცე მხარდაჭერა გამოხატეს. მათი თქმით, ისინი დეესკალაციის მცდელობებში მთავარ როლს ასრულებენ.

18 თებერვალს დონეცკისა და ლუგანსკის თვითგამოცხადებული რესპუბლიკების ლიდერებმა მოსახლეობას ევაკუაციისკენ მოუწოდეს. ისინი ამტკიცებდნენ, თითქოს ზელენსკის ბრძანებით უკრაინის ჯარი თავდასხმას აპირებდა. უკრაინის სამხედრო ძალების მეთაურმა ოკუპირებული ტერიტორიების მაცხოვრებლებს მიმართა და ეს ცნობები უარყო. ამ ცნობებს სიცრუე უწოდა ზელენსკის ოფისმაც. როგორც მათ აღნიშნეს, რუსეთი ყველანაირად ცდილობს მათ პროცოცირებას.

თვითაღიარებულმა ლიდერებმა კი მოუწოდეს ადგილობრივებს, რუსეთის ტერიტორიაზე გადასულიყვნენ. მოგვიანებით ცნობილი გახდა, რომ რუსეთი ამ დასახლებიდან "დევნილებს" ერთჯერადად 10 000 რუბლს გადაუხდის.

უკრაინის საგარეო საქმეთა სამინისტრო აცხადებს, რომ სიმართლეს არ შეესაბამება გავრცელებული ცნობები, დონეცკსა და ლუგანსკზე შეტევის შესახებ. მათივე თქმით, სიცრუეა ისიც, რომ დონბასში დივერსია იგეგმება.