პარტნიორობა ადამიანის უფლებებისთვის, რომელიც ნელი დოროყაშვილის ინტერესებს იცავს, აცხადებს, რომ სოციალურმა მუშაკმა მას მუქარაზე ჩივილი გადააფიქრებინა, ხოლო ჩოგბურთელ ნიკოლოზ ბასილაშვილს საჩუქარი მოსთხოვა.

"2020 წლის 16 მაისს ნელი დოროყაშვილმა სოციალურ მუშაკს შეატყობინა, რომ ნიკოლოზ ბასილაშვილი დაემუქრა. იგი იყო შეშინებული და აპირებდა პოლიციისთვის მიემართა [...] 2021 წლის ივლისში ნიკოლოზ ბასილაშვილის ადვოკატებმა სამართლებრივ დავაში მტკიცებულებად წარმოადგინეს ნიკოლოზ ბასილაშვილისა და ზემოხსენებული სოციალური მუშაკის 2020 წლის 21 მაისამდე მიმოწერა. მიმოწერაში ვკითხულობთ, რომ დავაში ჩართულმა სოციალურმა მუშაკმა ნიკოლოზ ბასილაშვილს საჩუქარი სთხოვა: მისი ხელმოწერით ჩოგბურთის ბურთის გადაცემა", — ნათქვამია განცხადებაში.

ორგანიზაციის განმარტებით, კანონის თანახმად, სოციალური მუშაკი ვალდებულია, რომ ოჯახში ქალთა მიმართ ძალადობისგან დასაცავად შესაბამისი ზომები მიიღოს. ამასთან, დაუშვებელია, რომ ის იყოს მხარე და მოქმედებდეს სუბიექტური ინტერესებით. თუ სოციალური მუშაკი ამ მოთხოვნას დაარღვევს მას დისციპლინური პასუხისმგებლობა უნდა დაეკისროს.

მათივე ცნობით, დოროყაშვილის ადვოკატებმა განცხადებით სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს მიმართეს და სოციალური მუშაკის ქცევის შესწავლა და კანონმდებლობის დარღვევის შემთხვევაში დისციპლინური პასუხისმგებლობის დაკისრება მოითხოვეს. PHR-ის თქმით, მოპოვებული მტკიცებულებების შედეგად, სააგენტომ დისციპლინური გადაცდომის ფაქტი დაადგინა.

ნიკოლოზ ბასილაშვილი ქართველი ჩოგბურთელია. საქართველოს ისტორიაში ყველაზე წარმატებულ ჩოგბურთელს ყოფილი ცოლი, ნეკა დოროყაშვილი ძალადობაში ადანაშაულებს. აღნიშნული ბრალდებით ის 2020 წლის გასული წლის მაისში დააკავეს — ნიკოლოზ ბასილაშვილს არასრულწლოვანი შვილის თანდასწრებით ყოფილ ცოლზე ძალადობაში ედება ბრალი. მას თბილისის საქალაქო სასამართლომ 100 ათასი ლარის ოდენობის გირაო შეუფარდა. ამასთან, შემაკავებელი ორდერი იყო გამოცემული როგორც ჩოგბურთელის, ისე მისი მშობლების მიმართ.

22 იანვარს TV პირველმა გაავრცელა აუდიო ჩანაწერები, რომელიც მათი თქმით, ნიკოლოზ ბასილაშვილსა და ნეკა დოროყაშვილს ეკუთვნის. როგორც ჟურნალისტი სიუჟეტში აღნიშნავს, ეს ფაილი ერთ-ერთია იმ ჩანაწერებს შორის, რომლებიც მხარეებმა სასამართლოში წარადგინეს.

გავრცელებულ ფაილებში ბასილაშვილი ყოფილ ცოლს შეურაცხმყოფელად მოიხსენიებს და მის დამცირებას ცდილობს. ამასთან, ის დოროყაშვილს სოციალურ ქსელში პოსტის რეკლამირებისთვის ეკამათება და ეუბნება, რომ "ღირსება" არ გააჩნია, რაზეც დოროყაშვილი პასუხობს, რომ ამ ფულს დაუბრუნებს. ჩანაწერებში ისმის კამათი შვილთან დაკავშირებით — ბასილაშვილი დოროყაშვილს ეუბნება: "შენ თვითონ გაზრდი და მოუარე".

ამას 24 იანვარს გამოეხმაურა თავად ბასილაშვილი და განაცხადა, რომ ჩანაწერები "კონტექსიდან ამოგლეჯილია". ის მათ ნამდვილობას არ უარყოფს, თუმცა ამტკიცებს, რომ დიალოგი, სადაც მისი და ყოფილი ცოლის, ნეკა დოროყაშვილის საუბარი ისმის,"სრული სახით ნაჩვენები" არ ყოფილა და "ნამდვილ შინაარსს არ ასახავდა".

ჩანაწერების გავრცელებას მიუღებელი უწოდა ორგანიზაციამ პარტნიორობა ადამიანის უფლებებისთვის, რომელიც ნეკა დოროყაშვილისა და ბავშვის უფლებებს იცავს. მათი განცხადებით, ფაილები პირველ რიგში ზიანს აყენებს დაზარალებულების, განსაკუთრებით, ბავშვის ინტერესებს და მათ მეორეულ ვიქტიმიზაციას იწვევს.