ელენე ბაქრაძის (დარიანის) პოეტური კრებულის შესწორებული ვერსიის გამოსაცემად საინიციატივო ჯგუფი შეიქმნა და თანხის შეგროვება დაიწყო. წიგნი თავდაპირველად გიორგი ლეონიძის სახელობის ქართული ლიტერატურის მუზეუმმა გამოსცა, თუმცა, მასში შეცდომით აღმოჩნდა ანა კალანდაძის ორი ლექსი. ამის შემდეგ, საქართველოს კულტურის, სპორტისა და ახალგაზრდობის სამინისტრომ დაბეჭდილი ტირაჟის დაბრუნება მოითხოვა და განაცხადა, რომ აღნიშნულ საკითხს სამომავლოდ "სერიოზულად" განიხილავდა მუზეუმის დირექტორთან და კრებულის ერთ-ერთი შემდგენელთან, ლაშა ბაქრაძესთან.

ტირაჟის ამოღების მიუხედავად, წიგნზე სოციალურ ქსელში მაინც დიდი მოთხოვნა გაჩნდა და სწორედ ამაზე საპასუხოდ შეიქმნა საინიციატივო ჯგუფი, რომელიც თავის გეგმას ფეისბუქზე აქვეყნებს.

გეგმაში მოიაზრება თანხის შეგროვება წიგნის შესწორებული ვერსიის გამოსაცემად. როგორც საინიციატივო ჯგუფის განცხადებიდან ვიგებთ, 500-ეგზემპლარიანი ტირაჟის დასაბეჭდა მუზეუმმა 6 280 ლარი დახარჯა, რომელიც მან სამინისტროს უნდა დაუბრუნოს. ამდენივეა საჭირო ხელახალი ტირაჟის დასაბეჭდად.

"ყველას, ვინც 25 ლარზე მეტს შესწირავს, საჩუქრად გადაეცემა ერთი წიგნი. რასაკვირველია, 25 ლარზე მეტის შემოწირვა შესაძლებელი და სასურველიცაა", — წერია ჯგუფის განცხადებაში.

აღსანიშნავია ისიც, რომ ჯგუფის განზრახვით, განახლებულ გამოცემას უნდა დაერთოს თანხის შემომწირველთა სია. ამდენად, თუკი სურვილი გაქვთ, სიაში თქვენი სახელიც მოხვდეს, შესაბამისი თანხა ბანკიდან უნდა გადარიცხოთ.

სასაჩუქრედ განკუთვნილი ეგზემპლარების გარდა, ტირაჟიდან დარჩენილი წიგნები მუზეუმს გადაეცემა.

"ჩვენი მიზანია საჭირო თანხა ერთ კვირაში შევაგროვოთ", — დასძენს საინიციატივო ჯგუფი.

დამატებითი ინფორმაციის გაგებას ჯგუფის ფეისბუქგვერდზე შეძლებთ.

ასევე იხილეთ: