ქართული ლიტერატურის მუზეუმის დირექტორი, ლაშა ბაქრაძე კულტურის სამინისტროს განცხადების საპასუხოდ ამბობს, რომ თუ მათ "სამართლიანად აღშფოთებულ მოქალაქეთა" აზრი აინტერესებთ, განცხადების ქვეშ კომენტარებს არ უნდა შლიდნენ.

ბაქრაძის თქმით, სამინისტროს განცხადებაზე პასუხს მოგვიანებით გაავრცელებს. მისივე განცხადებით, მას საზოგადოების შეწუხება არ სურდა, თუმცა უწყებამ მისი ჯანმრთელობის მდგომარეობაზე ინფორმაცია საჯარო გახადა.

"დიდი მადლობა სოლიდარობისთვის, ყურადღებისა და ინტერესისთვის. დღეს, მოგვიანებით, მოგახსენებთ ჩემს პასუხს სამინისტროს განცხადებაზე. ჟურნალისტებსაც ვთხოვ, ცოტა ხანი მაცალონ. მანამდე კი სამინისტროს ვურჩევდი, რადგან "სამართლიანად აღშფოთებულ მოქალაქეთა" აზრი აინტერესებთ — განცხადების ქვეშ კომენტარებს ნუ შლიან, მოქალაქეები არიან აღშფოთებულნი ასეთი საქციელით. რადგან სამინისტრომ საჯარო გახადა ჩემი ჯანმრთელობის მდგომარეობა, მე კი საზოგადოების შეწუხება არ მინდოდა. მოგახსენებთ, რომ კოვიდის მიუხედავად, თავს კარგად ვგრძნობ და ახლა განმეორებითი PCR ტესტი უნდა გავიკეთო", — წერს ის.

დღეს, 17 იანვარს კულტურის სამინისტრომ გამოაქვეყნა განცხადება, სადაც წერს, რომ გიორგი ლეონიძის სახელობის ქართული ლიტერატურის მუზეუმმა გამოსცა წიგნი, რომელშიც ანა კალანდაძის ორი ლექსის ავტორად ელენე ბაქრაძეა (დარიანი) მოხსენიებული. უწყების თქმით, მათ ამის შესახებ "აღშფოთებულმა მოქალაქეებმა" მიმართეს.

უწყებაში ამბობენ, რომ უახლოეს მომავალში საკითხის "სერიოზულად" განხილვას მუზეუმის დირექტორთან, და ამავე დროს, წიგნის შემდგენელთან, ლაშა ბაქრაძესთან გეგმავენ.