ლიტერატურის მუზეუმის დირექტორის, ლაშა ბაქრაძის განცხადებით, გუშინ, 16 იანვარს კულტურის სამინისტრომ მათ ელენე ბაქრაძის (დარიანი) წიგნის მთელი ტირაჟის გადაცემა მოსთხოვა. მისი ინფორმაციით, დღეს მუზეუმმა უწყებას დარჩენილი წიგნები უკვე გადასცა, ამასთან, აღიარეს შეცდომა და დარჩენილი ტირაჟისთვის შეცდომის გასწორების ფურცლის დართვას აპირებდნენ, თუმცა ეს საკმარისი არ აღმოჩნდა.

ბაქრაძე ამბობს, რომ მუზეუმის მიერ გამოცემული წიგნი სამინისტროსგანაა დაფინანსებული და ისინი მათგან ბეჭდვის ხარჯების დაბრუნებასაც ითხოვენ. ბაქრაძე აღნიშნავს, რომ მუზეუმს მცირე ბიუჯეტის აქვს, რის გამოც, ახალი, ჩასწორებული ტირაჟის გამოცემას ვეღარ შეძლებს.

"მაგრამ "არაერთი სამართლიანად აღშფოთებული მოქალაქე" მეტს ითხოვს და, სამწუხაროდ, სამინისტრომ საჭიროდ ჩათვალა მათი (ამ ეტაპზე) ასეთი განცხადებით დაკმაყოფილება, რასაც დღეს მართლაც "საზოგადოების მძაფრი რეაქცია მოჰყვა". სავარაუდოდ, იგივე მრჩევლები, ვინც სამინისტროს ამ განცხადების გაკეთებას ურჩევდნენ, ახლა საზოგადოების აზრის სრული იგნორირებისკენ მოუწოდებენ, ნაცვლად იმისა, რომ სამინისტრომ ბოდიში მოიხადოს ამ ტექსტის გამოქვეყნებისთვის, რომელმაც ძალიან ბევრს, სრულიად სამართლიანად, ჩვენი საერთო და ჯერაც დაუძლეველი საბჭოთა ტოტალიტარიზმის დრო გაახსენა", — წერს ის.

ბაქრაძე ხაზს უსვამს იმას, რომ მან წიგნში დაშვებული შეცდომები ჯერ კიდევ 2 იანვარს აღიარა. მისივე განმარტებით, მსგავსი რამ არც თუ ისე იშვიათია საგამომცემლო საქმეში და ძალიან დიდი მონდომებაა იმისთვის საჭირო, რომ ამაში შეთქმულება დაინახო.

"ასეთი შეცდომები, სამწუხაროდ, არც თუ იშვიათია საგამომცემლო საქმეში და ძალიან დიდი მონდომებაა საჭირო, რომ აქ რაღაც შეთქმულება დაინახო — ამჯერად, უკვე ანა კალანდაძის წინააღმდეგ. როდესაც რაღაც დანაშაულზე ჩნდება ეჭვი, მოტივიც უნდა არსებობდეს და რა მოტივი შეიძლება გვქონდეს გამომცემელსა და რედაქტორს, რომ ისედაც პაოლო იაშვილის ლექსების მისაკუთრების მცდელობაში ეჭვმიტანილ ელენე დარიანს ახლა კიდევ ანა კალანდაძის ლექსები "მივაკუთვნოთ"?" — აღნიშნავს ის.

დღეს, 17 იანვარს კულტურის სამინისტრომ გაავრცელა განცხადება, სადაც აღნიშნულია, რომ ელენე ბაქრაძის (დარიანის) წიგნში ანა კალანდაძის ორი ლექსის მოხვედრის გამო, ლიტერატურის მუზეუმს გამოცემის გავრცელების შეწყვეტა მოსთხოვეს.

უწყებაში ამბობენ, რომ შეცდომის შესახებ მათ "აღშფოთებულმა მოქალაქეებმა" მიმართეს. მათივე თქმით, უახლოეს მომავალში საკითხის "სერიოზულად" განხილვას მუზეუმის დირექტორთან, და ამავე დროს, წიგნის შემდგენელთან, ლაშა ბაქრაძესთან გეგმავენ.