დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ფინანსთა მინისტრთან დააყენა საკითხი, რომ ფულადი წახალისება ვაქცინის ბუსტერ დოზის გაკეთების შემთხვევაშიც იყოს.

გამყრელიძის თქმით, აქამდე არსებულმა 200-ლარიანმა ფულადმა წახალისებამ, როგორც 60, ასევე, 50 წლის ადამიანებშიც იმუშავა და აცრის მაჩვენებელი გაიზარდა.

"მე თვითონ, გიდასტურებთ, რომ ვემხრობი და დღე დავაყენე, ასევე, საკითხი ფინანსთა მინისტრის წინაშე, რომ იყოს თუ შესაძლებელია, იმიტომ, რომ თუ ბუსტერიზაციას გავზრდით, ეს სერიოზულად შეამცირებს ომიკრონის ტალღის სიმძაფრეს. ამიტომ, მოგიწოდებთ ერთი, მაგრამ რა თქმა უნდა, ფულადი წახალისება თქვენზე (ჟურნალისტებზე) ვერ, მაგრამ ჩემი ასაკის ადამიანებზე იქნება, მაგრამ მე ბუსტერი გაკეთებული მაქვს უკვე", — განაცხადა მან.

ვაქცინირების შემთხვევაში, 200-ლარიანი "ფინანსური წახალისება" საქართველოში 8 ნოემბერს ამოქმედდა. იანვრიდან კი ასაკობრივმა ზღვარმა 50 წლამდე დაიწია.