საკოორდინაციო საბჭოსთან არსებული ოპერაციული შტაბის უფროსის, გიორგი ღიბრაძის განცხადებით, ვაქცინაციის ფინანსური წახალისება იანვარშიც გაგრძელდება. მისივე თქმით, შემდეგი თვიდან ზღვარი დაიწევს და მას 50 წელს ზემოთ ასაკის მოქალაქეები მიიღებენ.

"გადაწყვეტილების შესაბამისად, იანვრის თვეში გაგრძელდება წახალისების პროგრამა, რომელიც გულისხმობდა 200-ლარიან წახალისებას 60 წელს ზემოთ ასაკის პირებისთვის. აქვე კიდევ ერთი სიახლეა, ასაკობრივი ზღვარი დაიწევს 50 წლამდე და ის ხალხი, ვინც ღებულობდა 60 წელს ზემოთ ასაკის, იანვრის თვიდან უკვე მიიღებს 50 წელს ზემოთ, ვინც აიცრება", — აღნიშნა მან.

როგორც ჯანდაცვის მინისტრის მოადგილემ, თამარ გაბუნიამ აღნიშნა, წამახალისებელი პროგრამის დაწყებიდან შესაბამის ასაკობრივ ჯგუფში აცრების რაოდენობამ მოიმატა და 100 000-ზე მეტი პირი აიცრა ამ პერიოდში. მისი თქმით, სწორედ ამიტომ მიიღეს მისი გაგრძელების გადაწყვეტილება.