საგარეო საქმეთა მინისტრმა, დავით ზალკალიანმა ბრიუსელში NATO-ს გენერალურ მდივანთან, იენს სტოლტენბერგთან შეხვედრის შეფასებისას განაცხადა, რომ გენერალურმა მდივანმა NATO-ს მიერ მიღებული გადაწყვეტილებების გადახედვასთან დაკავშირებით მკაფიო პოზიცია დააფიქსირა და თქვა, რომ პრიორიტეტი საქართველოს სუვერენიტეტი, ტერიტორიული მთლიანობა და ევროინტეგრაციაა.

"ძალიან ნაყოფიერი შეხვედრა იყო ნატოს გენერალურ მდივანთან და ყველა მოლოდინი, რაც მქონდა, კიდევ ერთხელ დადასტურდა აღნიშნულ შეხვედრაზე. გენერალურმა მდივანმა მკაფიო პოზიცია დააფიქსირა იმასთან დაკავშირებით, რომ არ იქნება არანაირი გადახედვა NATO-ს მიერ მიღებული გადაწყვეტილებების, რომ მთავარი პრიორიტეტი და წითელი ხაზები გადის საქართველოს სუვერენიტეტსა და ტერიტორიულ მთლიანობაზე და ჩვენს ევროატლანტიკურ ინტეგრაციაზე", — განაცხადა ზალკალიანმა.

მინისტრის თქმით, ყველაფერს გააკეთებენ, რომ პარტნიორებთან მჭიდრო კოორდინაციის რეჟიმში პროცესი არ დაზიანდეს და ყველა დაგეგმილი ღონისძიება ჩატარდეს შესაბამის ვადებში შესაბამისი შინაარსით.