სოციალური სააგენტოს თანამშრომლებმა ჯანდაცვის სამინისტროში ოფიციალური განცხადება ჩააბარეს, რომლის მიხევდითაც ორშაბათიდან, 17 იანვრიდან გაიფიცებიან. მათი ინფორმაციით, რამდენიმე თვის განმავლობაში მიმდინარეობდა სამინისტროსთან მედიაციის პროცესი, რომელიც უშედეგოდ დასრულდა. სწორედ ამიტომ, მათ გადაწყვიტეს მიემართათ პროტესტის ამგვარი ფორმისთვის.

რაც შეეხება მოთხოვნებს, ისინი ძირითადად ანაზღაურებასა და სამუშაო პირობების გაუმჯობესებას ეხება: ხელმომწერებს სურთ ანაზღაურების გაზრდა 100%-მდე, ასევე, რეგიონულ განყოფილებებსა და თბლისის ცენტრებში ერთი და იგივე პოზიციებზე დასაქმებულთა ანაზღაურების გათანაბრება. გარდა ამისა, ისინი ითხოვენ სამსახურეობრივი მოვალეობის შესრულებისას გაწეული ხარჯებს ანაზღაურებას და დამატებითი სამუშაოს დაკისრების შემთხვევაში, შესაბამისად, დამატებით ანაზღაურებას. სააგენტოს თანამშრომლებს, ასევე, სურთ ხელშეკრულებით განისაზღვროს ხელფასის ყოველწლიური კალკულაცია ინფლაციის კურსის გათვალისწინებით. მოთხოვნები ეხება სააგენტოს ცენტრებში დასაქმებულ პირთა რაოდენობის ზრდას, რათა "არ მოუწიოს დასაქმებულს სხვა დამატებითი პოზიციების ფუნქცია მოვალეობის შეთავსება".

"სააგენტო ამდენი ხნის მანძილზე არასერიოზულად უდგება ამ ჩვენს პროტესტს, რამაც შესაბამის შედეგამდე მიგვიყვანა, რომ ჩვენ გუშინ უკვე გავაგზავნეთ შეტყობინება, როგორც სააგენტოში, ასევე, შეტყობინება გავუგზავნეთ მინისტრს, რომ 17 იანვრიდან, ანუ ორშაბათიდან, სოციალური მომსახურების სააგენტოს 390 ადამიანი გაიფიციება, რაც ნიშნავს იმას, რომ უმეტესობა ცენტრებისა ფუნქციონირებას შეწყვეტს", — განაცხადა პროტესტის ერთ-ერთმა მონაწილემ სამინისტროში ხელმოწერების ჩაბარების შემდეგ.

ორშაბათიდან, 17 იანვრიდან სოციალური სააგენტოს ცენტრები ბენეფიციარებს არ მოემსახურებიან თბილისის არცერთ რაიონში, ასევე ბათუმში, ხულოში, ხელვაჩაურში, შუახევში, ქუთაისში, ბაღდათში, ზესტაფონში, თერჯოლაში, ხარაგაულში, სიღნაღში, თელავში, ახმეტაში, ყვარელში, გურჯაანში, ლაგოდეხში, ოზურგეთში, ჩოხატაურში, ლანჩხუთში, მარტვილში, ხობში, ზუგდიდში, აბაშაში, მესტიაში, მცხეთაში, დუშეთში, თიანეთში, ბორჯომი, გორში, ქარელისა და დმანისში.