საერთაშორისო გამჭირვალობა — საქართველოს შეფასებით, ხაზარაძე-ჯაფარიძე-წერეთლის საქმე პოლიტიკურად მოტივირებულია და მისი მიზანი, შესაძლოა, პოლიტიკური ოპონენტების "დასჯა" და ქვეყნისთვის მნიშვნელოვანი სტრატეგიული ობიექტის მშენებლობის შეჩერება იყოს. ორგანიზაციის განცხადებით, მათ მიერ მოწვეული დამოუკიდებელი საერთაშორისო ექსპერტის 2020 წლის დასკვნაც ადასტურებს იმას, რომ მამუკა ხაზარაძეს, ბადრი ჯაფარიძესა და ავთანდილ წერეთელს ფულის გათეთრების დანაშაული არ ჩაუდენიათ.

"საქმის მასალების შესწავლისა და პროცესზე დაკვირვების საფუძველზე შეგვიძლია ვთქვათ, რომ აღნიშნული საქმე ცალსახად არის პოლიტიკურად მოტივირებული და შესაძლოა, ემსახურებოდეს ერთის მხრივ, პოლიტიკური ოპონენტის დასჯასა და დისკრედიტაციას და მეორეს მხრივ, ქვეყნისათვის მნიშვნელოვანი სტრატეგიული ობიექტის მშენებლობის შეჩერებას.

[...] ექსპერტმა დასკვნა საქართველოს კანონმდებლობისა და საერთაშორისო აქტების, საქმეში არსებული ფაქტების, პროცესში ჩართულ სუბიქტებთან შეხვედრისა და ფულის გათეთრების საქმეებზე საერთაშორისოდ დადგენილი პრაქტიკის შეფასების საფუძველზე მოამზადა. დასკვნის მიხედვით, ამ საქმეში არ არსებობს იმის მტკიცებულება, რომ მამუკა ხაზარაძემ, ბადრი ჯაფარიძემ და ავთანდილ წერეთელმა ინდივიდუალურად ან ჯგუფურად ფულის გათეთრების დანაშაული ჩაიდინეს", — აცხადებენ ორგანიზაციაში.

ორგანიზაციაში განმარტავენ, რომ საერთაშორისო პრაქტიკით, არასათანადო და ხელოვნურად შექმნილი ბრალდების საფუძველზე, ხანდაზმულობის ვადისთვის გვერდის ავლა სამართალწაროების პროცესის ბოროტად გამოყენებად მიიჩნევა. მათივე განცხადებით, მიუხედავად იმისა, რომ ლელოს ლიდერებსა და TV პირველის დამფუძნებლის ოჯახის წევრს თავისუფლება არ აღუკვეთეს, დღეს საზოგადოება პოლიტიკური მარლთმსაჯულების მომსწრე გახდა. TI მიიჩნევს, რომ სასამართლო გადაწყვეტილებაში პოლიტიკური მოტივი იკვეთებოდა და ბრალდებულთა ოჯახების რეპუტაციას სერიოზული ზიანი მიადგა.

მოსამართლე გიორგი არევაძემ ე.წ. ფულის გათეთრების საქმის განაჩენი გამოაცხადა. მან ბადრი ჯაფარიძესა და მამუკა ხაზარაძეს ბრალდება თაღლითობის მუხლით გადაუკვალიფიცირა და თითოეულს 7 წლით თავისუფლების აღკვეთა მიუსაჯა, თუმცა დანაშაულის ხანდაზმულობის გამო ისინი სასჯელისგან გათავისუფლდნენ. ბრალი გადაუკვალიფიცირდა იგივე საქმეში ბრალდებულ ავთანდილ წერეთელსაც. მას პროკურატურა ფულის გათეთრებაში ამსრულებლობასა და თანამონაწილეობას ედავებოდა, თუმცა ხაზარაძე-ჯაფარიძისთვს ბრალის გადაკვალიფიცირების შემდეგ მოსამართლემ წერეთელი თაღლითობაში ამსრულებლისა და თანამონაწილობისთვის ცნო დამნაშავედ.

საქალაქო სასამართლოს მიერ გამოტანილ განაჩენს გაასაჩივრებენ მამუკა ხაზარაძე, ბადრი ჯაფარიძე და ავთანდილ წერეთელიც. ხაზარაძემ მის მიმართ გამოტანილი განაჩენის შეფასებისას სასამართლოს "ერთი კაცის მართლმსაჯულება" უწოდა.

მოსამართლის გადაწყვეტილებას გაასაჩივრებს პროკურატურაც. უწყების განცხადებით, სასამართლომ ბრალდების მხარის მიერ წარდგენილი მტკიცებულებები "სრულად გაიზიარა", თუმცა "არ დაეთანხმა" ბრალდების მხარის შეფასებას ჩადენილი დანაშაულის სამართლებრივ კვალიფიკაციაში.

ამავე თემაზე: