დღეს, საქართველოს პარლამენტის შენობაში, 11:00 საათზე „ოცნების“ მიერ არჩეული პრეზიდენტის, მიხეილ ყაველაშვილის ინაუგურაცია გაიმართება. გვიან ღამით, ოცნების პარლამენტის თავმჯდომარემ, შალვა პაპუაშვილმა ინაუგურაციის რეპეტიციის კადრები გაავრცელა წარწერით: "ხვალ ისტორიული დღეა".

ცერემონიაზე დასასწრებად და მონაწილეობის მისაღებად მოწვეული არიან პრეზიდენტის საარჩევნო კოლეგიის წევრები, რომელშიც შედიან პარლამენტის წევრები, ადგილობრივი თვითმმართველობის წარმომადგენლები, აჭარის და აფხაზეთის უმაღლესი საბჭოს წარმომადგენლები, საქართველოს მთავრობა, კონსტიტუციური ორგანოები, საქართველოს მართლმადიდებელი ეკლესიის წარმომადგენლები. ღონისძიებაზე დაპატიჟებული არ არიან დიპლომატიური კორპუსის წარმომადგენლები.

ამის პარალელურად 9:00 საათიდან დაგეგმილია საპროტესტო აქცია — "წითელი ბარათი ყაველაშვილს". 10:00 საათზე კი ორბელიანების სასახლეში საქართველოს პრეზიდენტის, სალომე ზურაბიშვილის ბრიფინგი გაიმართება.

8:55 წუთისთვის პარლამენტთან უკვე მობილიზებულია პოლიცია.

"მოგესალმებით ორბელიანების სასახლიდან. აქ ვარ, აქ ვიქნები, ღამესაც აქ ვატარებ. ხვალ, დილის 10 საათზე, გელოდებით ორბელიანების სასახლესთან და აქედან გეტყვით როგორი იქნება ხვალინდელი დღე. გეტყვით, როგორი იქნება შემდეგი დღეები და როგორი იქნება გამარჯვების დღეები", — განაცხადა სალომე ზურაბიშვილმა 28 დეკემბერს გამართულ ბრიფინგზე.