"ბატონ მიხეილს ვულოცავ პრეზიდენტობას, მინდა, მას ახალ როლში ვუსურვო წარმატებები ჩვენი ქვეყნის საკეთილდღეოდ, ჩვენი ქვეყნის ინტერესების დასაცავად. რა თქმა უნდა, ჩვენი ყველას მოლოდინია, რომ ის ღირსეულად შეასრულებს იმ მოვალეობას, რომელიც საქართველოს პრეზიდენტს კანონმდებლობით და კონსტიტუციით აკისრია. ის არის ღირსეული, პატრიოტი ადამიანი და ამაში ჩვენ დარწმუნებულები ვართ", — განაცხადა "ოცნების" ხელისუფლების ეკონომიკისა და მდგრადი განვითარების მინისტრმა.

ლევან დავითაშვილის პროგნოზით, 2025 წელს ოპოზიციური პარტიებიც მიიღებენ ქვეყანაში არსებულ რეალობას. მინისტრი იმედს გამოთქვამს, რომ ისინი პარლამენტის ფორმატში გააგრძელებენ ოპონირებას და მათი როლის შესრულებას.

"მათი როლი ზუსტად ეს არის, ის ხმები, რომელიც მათ მიიღეს და ხალხის ნაწილმა, რომელმაც მათ ნდობა გამოუცხადა - პოლიტიკურ პროცესებში უნდა მიიღონ მონაწილეობა კანონმდებლობის შესაბამისად და ვფიქრობ, რომ პროცესი იქნება აბსოლუტურად ცივილიზებული", — აღნიშნა პირველმა ვიცე-პრემიერმა.