ნაციონალური მოძრაობის წევრის, ხატია დეკანოიძის განცხადებით, ის, რომ ხაზარაძე-ჯაფარიძე-წერეთლის საქმეზე მთელი ქვეყანა ქართული ოცნების დამფუძნებლის, ბიძინა ივანიშვილის გადაწყვეტილებას ელოდა, დღევანდელობის ყველაზე დიდი სიმახინჯეა. დეკანოიძე ხაზს უსვამს, რომ ივანიშვილს მცირედით, თუმცა საერთაშორისო პარტნიორების "ერიდება", ამიტომ, მიიჩნევს, რომ ოპოზიცია მათ მთავარ მოკავშირედ უნდა გადაიქცეს.

"ძალიან მიხარია, ჩემს მეგობრებს ციხეში არ ვიხილავ. მთელი ქვეყანა რომ ივანიშვილის გადაწყვეტილებას ელოდა, ყველაზე დიდი სიმახინჯეა ჩვენი დღევანდელობის. უნდა გვახსოვდეს, რომ ივანიშვილი თუ რამეს ერიდება კიდევ (მცირედით) ჩვენი საერთაშორისო პარტნიორები არიან. მათზე დიდი მოკავშირე ჩვენ არ გვყავს, ამიტომ ოპოზიციაც მათ მთავარ მოკავშირედ უნდა გადაიქცეს. ბრძოლას და მუშაობას აზრი აქვს", — წერს ის ფეისბუქპოსტში.

მოსამართლე გიორგი არევაძემ ე.წ. ფულის გათეთრების საქმის განაჩენი გამოაცხადა. მან ბადრი ჯაფარიძესა და მამუკა ხაზარაძეს ბრალდება თაღლითობის მუხლით გადაუკვალიფიცირა და თითოეულს 7 წლით თავისუფლების აღკვეთა მიუსაჯა, თუმცა დანაშაულის ხანდაზმულობის გამო ისინი სასჯელისგან გათავისუფლდნენ. ბრალი გადაუკვალიფიცირდა იგივე საქმეში ბრალდებულ ავთანდილ წერეთელსაც. მას პროკურატურა ფულის გათეთრებაში ამსრულებლობასა და თანამონაწილეობას ედავებოდა, თუმცა ხაზარაძე-ჯაფარიძისთვს ბრალის გადაკვალიფიცირების შემდეგ მოსამართლემ წერეთელი თაღლითობაში ამსრულებლისა და თანამონაწილობისთვის ცნო დამნაშავედ.

საქალაქო სასამართლოს მიერ გამოტანილ განაჩენს გაასაჩივრებენ მამუკა ხაზარაძე, ბადრი ჯაფარიძე და ავთანდილ წერეთელიც. ხაზარაძემ მის მიმართ გამოტანილი განაჩენის შეფასებისას სასამართლოს "ერთი კაცის მართლმსაჯულება" უწოდა.

მოსამართლის გადაწყვეტილებას გაასაჩივრებს პროკურატურაც. უწყების განცხადებით, სასამართლომ ბრალდების მხარის მიერ წარდგენილი მტკიცებულებები "სრულად გაიზიარა", თუმცა "არ დაეთანხმა" ბრალდების მხარის შეფასებას ჩადენილი დანაშაულის სამართლებრივ კვალიფიკაციაში.

ამავე თემაზე: