"უილსონი კეზერაშვილის ფულით აკეთებს განცხადებებს, ბილდტი — ნაცმოძრაობის ფულით", — ამის შესახებ ოცნების პრემიერმინისტრმა ირაკლი კობახიძემ პარლამენტში გამართულ ბრიფინგზე განაცხადა, სადაც მას ჟურნალისტმა უცხოელი პოლიტიკოსების, მათ შორის ამერიკელი კონგრესმენისა და ჰელსინკის კომისიის თავმჯდომარე, ჯო უილსონისა და შვედეთის ყოფილი პრემიერმინისტრისა და საგარეო ურთიერთობების საკითხებში ევროპული საბჭოს თანათავმჯდომარე, კარლ ბილდტის განცხადებებზე სთხოვა კომენტარი.

"იგივე ბილდტი, იგივე უილსონი, ორივეს აქვს დაფიქსირებული შემოსავალი. ერთს ნაცმოძრაობისგან, მეორეს — უშუალოდ კეზერაშვილისგან. უილსონი კეზერაშვილის ფულით აკეთებს განცხადებებს, ბილდტი, სააკაშვილის და ნაცმოძრაობის ფულით აკეთებდა განცხადებებს. რაც შეეხება რადიკალურ ოპოზიციას, მათ მოუწიათ არჩევნების შედეგების აღიარება. ერთი პარტიის გარდა, ეს არის გვარამიას პარტია, ყველამ მიიღო უკვე დაფინანსება სახელმწიფოსგან შემდგარი არჩევნების საფუძველზე. მათ პირველი თანხები უკვე ჩაერიცხათ", — განაცხადა ირაკლი კობახიძემ.