მე აქედან გამოვალ, თქვენთან გამოვალ თქვენთან ერთად ვიქნები, — განაცხადა საქართველოს პრეზიდენტმა, სალომე ზურაბიშვილმა ორბელიანების სასახლეში გამართულ ბრიფინგზე. მისი თქმით, პრეზიდენტის სასახლეს ტოვებს და თან მიაქვს ლეგიტიმურობა.

"არაფრის არ გვეშინია, არც გისოსების. მე მინდა თქვენ ჩაგაბაროთ ანგარიში.

იქითკენ არის სიცარიელე, აქ არის საზოგადოება, იქითკენ არიან ჩაკეტილები, ჩვენ ვართ გარეთ, იმიტომ, რომ ჩვენ არაფრის გვეშინია, არც გისოსების... ეს არის ნამდვილი პაროდია და ამ სახელმწიფოს ასეთი პაროდიები არ ეკადრება... იქ არიან ჩაკეტილნი, შეშინებულნი, გაყიდულნი, არალეგიტიმური, არაღიარებული, სანქცირებული და დაბოღმილები. ჩვენ ვართ ღია, თავისუფალი, ლაღი და მშვიდი. ჩვენთან არის სიმართლე, რადგან ჩვენთან არის სიყვარული - ქვეყნის სიყვარული და ჩვენთან არის ერთმანეთის სიყვარული და ამიტომ არის, რომ ჩვენ გავიმარჯვებთ

6 წლის წინ მე დავდე ფიცი კონსტიტუციაზე, მაგრამ კიდევ უფრო თქვენს მიმართ ერთგულებაზე და თქვენს მიმართ ერთგულებაზე და ეს ყველაფერი არაფრით არ შეიცვლება მე ვიქნები სასახლეში, თუ სასახლის გარეთ.

მე აქედან გამოვალ, თქვენთან გამოვალ თქვენთან ერთად ვიქნები.

მე ჩემთან ერთად მიმაქვს ლეგიტიმურობა", — განაცხადა პრეზიდენტმა ზურაბიშვილმა.

ამის პარალელურად საქართველოს პარლამენტის შენობაში 11:00 საათზე ოცნების მიერ არჩეული პრეზიდენტის, მიხეილ ყაველაშვილის ინაუგურაცია დაიწყო, რომლის ლეგიტიმაცია არ უღიარებია EU-ს წევრი ქვეყნების უმრავლესობას და აშშ-ს.