აშშ-ის სახელმწიფო მდივნის მოადგილე, ვენდი შერმანი ჟენევაში რუსეთის საგარეო საქმეთა მინისტრის მოადგილეს, სერგეი რიაბკოვს შეხვდა. თითქმის 8-საათიანი შეხვედრის შემდეგ მათ ჟურნალისტებთან ისაუბრეს. NY Times-ის ინფორმაციით, ორივე მხარე თანახმაა მოლაპარაკებების გაგრძელებაზე, თუმცა კომენტარებით ცხადია, რომ ისინი შორს არიან შეთანხმების მიღწევისგან.

შეხვედრის შემდეგ რიაბკოვმა განაცხადა, რომ რუსეთს უკრაინზე თავდასხმის გეგმა არ აქვს. DW-ის ინფორმაციით, რიაბკოვი ამტკიცებდა, რომ არ არსებობს არანაირი საფრთხე, ამ მხრივ ესკალაცია მოხდეს. გარდა ამისა, განაცხადა, რომ აშშ-ს პოზიციები "გასაკვირი არ არის".

"ჩვენ ავუხსენით კოლეგებს, რომ არანაირი გეგმა და განზრახვა უკრაინაზე თავდასხმის არ გვაქვს და არც შეიძლება გვქონდეს. ყველა ღონისძიება, რომელიც ჯარების საბრძოლო მომზადებას ეხება, ჩვენ ტერიტორიაზე ხორციელდება", — მის ციტატას რუსული სახელმწიფო სააგენტო Tass ავრცელებს.

შერმანმა თქვა, რომ მათთვის მიუღებელია რუსეთის შეთავაზება ნატოსგან გარანტიების მიღების შესახებ, ისევე, როგორც უკრაინის ნატოში არმიღების მოთხოვნა. მისი განცხადებით, ვერაფერი აიძულებთ, რომ ნატოს ღია კარის პოლიტიკა შეიცვალოს. შერმანმა აღნიშნა ისიც, რომ არ მიიღებენ გადაწყვეტილებას უკრაინაზე უკრაინის გარეშე, ისევე, როგორც ნატოზე, ნატოს გარეშე.

შერმანის თქმით, შეხვედრაზე გულწრფელად და პირდაპირ ისაუბრეს და ეს იყო დისკუსია ერთმანეთის უკეთ გასაგებად. მისივე თქმით, ეს არ იყო ის, რასაც მოლაპარაკებებს ეძახიან. თავის მხრივ რიაბკოვიც ამბობს, რომ შეხვედრა რთული, პროფესიონალური და კონკრეტული იყო. მისივე თქმით, აშშ სერიოზულად მიუდგა რუსეთის მოთხოვნებს.

ამავე თემაზე: