ადამიანის უფლებებზე მომუშავე არასამთავრობო ორგანიზაციების ნაწილი უარყოფითად აფასებს კონსტიტუციაში ქორწინების განსაზღვრის შესახებ საკონსტიტუციო კომისიაში წარმოდგენილ ინიციატივას. NGO-ები მიიჩნევენ, რომ შემოთავაზებული ფორმულირებით საკონსტიტუციო ჩანაწერი ჰომოფობიურ კონოტაციას ატარებს და ხელს შეუწყობს ლგბტ პირების მიმართ ნეგატიური განწყობების გაძლიერებას.

არასამთავრობოები აცხადებენ, რომ გახშირებული ჰომოფობიური და ტრანსფობიური დანაშაულების ფონზე, აღნიშნული ინიციატივა კი უფრო დაამძიმებს ლგბტ ჯგუფების უფლებრივ მდგომარეობას:

"ქორწინების თანასწორობის თეორიული შესაძლებლობის კონსტიტუციური აკრძალვით, საქართველო წინააღმდეგობაში მოვა ადამიანის უფლებათა ევროპული სასამართლოს სტანდარტთან."

ერთი და იმავე სქესის ადამიანებისთვის ქორწინების კონსტიტუციით აკრძალვის შემთხვევაში, NGO-ების აზრით, პარალელურად უნდა დაიწყოს საკანონმდებლო ცვლილებების პროცესი:

"ქორწინების შესახებ საკონსტიტუციო ცვლილების ძალაში შესვლის შემთხვევაში, აუცილებელია ასევე კონსტიტუციით გარანტირებული იყოს ერთი და იმავე სქესის მქონე წყვილებისთვის სამოქალაქო პარტნიორობის შესაძლებლობა. მივიჩნევთ, რომ ქორწინების შესახებ კონსტიტუციის მუხლს უნდა დაემატოს შემდეგი ფორმულირება "თანაცხოვრების სხვა ფორმები რეგულირდება კანონით." ასეთ შემთხვევაში, ქორწინების კონსტიტუციური აკრძალვის მიუხედავად, ეს ცვლილებები არ იქნება აღქმული, როგორც უფლებრივი მდგომარეობის შეზღუდვა და უმცირესობებისთვის ხელმისაწვდომი იქნება მნიშვნელოვანი უფლებრივი გარანტიები (მემკვიდრეობისა თუ ქონებრივი უფლებები, ურთიერთრჩენის ვალდებულებები, პატიმრისა თუ ჰოსპიტალიზებული პარტნიორის მონახულების უფლება და სხვა)."

ამასთან, არასამთავრობოების განცხადებით, თანასწორობის რეალური უზრუნველყოფისთვის, მნიშვნელოვანია კონსტიტუციაში დისკრიმინაციის ამკრძალავი ნიშნების ჩამონათვალი ნათლად მოიცავდეს სექსუალურ ორიენტაციას და გენდერულ იდენტობას.

განცხადებას ხელს აწერენ:

  • სამართლიანი არჩევნებისა და დემოკრატიის საერთაშორისო საზოგადოება (ISFED)
  • თანასწორობის მოძრაობა
  • ფონდი ღია საზოგადოება - საქართველო (OSGF)
  • ადამიანის უფლებათა ცენტრი
  • საქართველოს ახალგაზრდა იურისტთა ასოციაცია
  • მედიის განვითარების ფონდი (MDF)
  • საერთაშორისო გამჭვირვალობა - საქართველო
  • საქართველოს დემოკრატიული ინიციატივა (GDI)
  • პარტნიორობა ადამიანის უფლებებისთვის (PHR)
  • კავშირი "საფარი"
  • ქალთა ინიციატივების მხარდამჭერი ჯგუფი (WISG)

გეი ქორწინების კონსტიტუციური აკრძალვა ქართული ოცნების ერთ-ერთი მთავარი წინასაარჩევნო დაპირება იყო.

აღსანიშნავია, რომ ერთი და იმავე სქესის მქონე პირთა ქორწინება კანონმდებლობით ისედაც აკრძალულია, ხოლო ლგბტ ჯგუფების მხრიდან ქორწინების თანასწორობის მოთხოვნა არასდროს დამდგარა. მიუხედავად ამისა, გასული წლების განმავლობაში თება არა ერთხელ გამხდარა პოლიტიკური მანიპულაციების საგანი.