საქსტატის წინასწარი შეფასებით, მიმდინარე წლის ნოემბერში, წინა წლის შესაბამის თვესთან შედარებით, საქართველოს ეკონომიკა 12%-ით გაიზარდა, ხოლო 2021 წლის პირველი თერთმეტითვის ზრდის საშუალო მაჩვენებელი 10,7% იყო.

ფოტო: საქსტატი

უნდა ითქვას, რომ 2020 წლის ნოემბერში ეკონომიკის წლიური ვარდა 7,7% იყო. შესაბამისად, წელს 2019 წლის ნოემბერთან შედარებით ეკონომიკა 3,4%-ით არის გაზრდილი.

საქსტატის ანგარიშში ნათქვამია, რომ 2021 წლის ნოემბერში, წინა წლის შესაბამის პერიოდთან შედარებით ზრდა შეინიშნებოდა შემდეგ დარგებში: დამამუშავებელი მრეწველობა, ტრანსპორტი და დასაწყობება, ხელოვნება, გართობა და დასვენება, ვაჭრობა, სასტუმროები და რესტორნები, საფინანსო და სადაზღვევო საქმიანობა. კლების ტენდენცია დაფიქსირდა მშენებლობის დარგში.

საქსტატის ანგარიშში მითითებულია, რომ 2021 წლის იანვარ-ნოემბერში საქონლის ექსპორტი 26,7%-ით, ხოლო იმპორტი 24,5%-ით გაიზარდა. შესაბამისად, საგარეო სავაჭრო ბრუნვა 25,1%-ით არის გაზრდილი.

მიმდინარე წლის ნოემბერში ახლადრეგისტრირებულ საწარმოთა რაოდენობა წლიურად 28,5%-ით, 4 441-მდე გაიზარდა. ამავე პერიოდში დღგ-ს გადამხდელ საწარმოთა ბრუნვამ 32,6%-ით 9,97 მილიარდ ლარამდე მოიმატა.

ეკონომიკური ზრდის ანგარიში ქვეყანაში არსებული ინფლაციის შესახებ მონაცემებსაც მოიცავს და აღნიშნულია, რომ ნოემბერში წლიური ინფლაცია 12,5%-იყო. აღსანიშნავია, რომ მიმდინარე წელს საქართველოში ინფლაცია ბოლო 10 წლის მაქსიმუმზეა.

შეგახსენებთ, რომ საქართველოს ეკონომიკის შემცირება გასული წლის მარტიდან დაიწყო, რაც კორონავირუსით გამოწვეული პანდემიის ფონზე მიღებულ შეზღუდვებს უკავშირდებოდა. ეკონომიკის ვარდნის ტენდენცია გაგრძელდა მომდევნო თვეებშიც. ბოლო გათვლების მიხედვით, 2020 წლის მეორე კვარტალში ქვეყნის მთლიანი შიდა პროდუქტი 13,2%-ით, მესამე კვარტალში — 5,6%-ით, ხოლო მეოთხე კვარტალში 6,8%-ით შემცირდა. წლიურად, 2020-ში საქართველოს ეკონომიკამ 6,8%-ით იკლო.

რაც შეეხება მიმდინარე წლის სტატისტიკას, პირველ კვარტალში ქვეყნის ეკონომიკა 4,1%-ით შემცირდა, მერე კვარტალში 28,9%-ით გაიზარდა, ხოლო მესამე კვარტალში 9%-იანი ზრდა დაფიქსირდა. მთავრობა წელს ეკონომიკის ორნიშნა ზრდას ელოდება.