ქართული ოცნების თავმჯდომარის, ირაკლი კობახიძის განცხადებით, სახელმწიფო ინსპექტორის სამსახურის კანონპროექტზე სახელმწიფო ინსპექტორი, ლონდა თოლორაია საქმის კურსში მისი დაინიცირების შემდეგ ჩააყენეს. მისივე თქმით, მმართველ პარტიას თოლორაიასთან კითხვები არ აქვს და ცვლილება მხოლოდ სამართლებრივი და ინსტიტუციური საკითხია.

"როდესაც მოხდა კანონის დაინიცირება, შემდეგ ჩავაყენეთ ჩვენ სამსახურის ხელმძღვანელი, პირველ რიგში, საქმის კურსში. ეს გააკეთა იურიდიული კომიტეტის ხელმძღვანელმა", — განაცხადა მან.

მისივე თქმით, ინსპექტორის სამსახურის ორი ფუნქცია ხელოვნურად იყო გაერთიანებული. კობახიძე ამბობს, რომ ერთ უწყებაში ისეთი ორი მიმართულების გაერთიანება, როგორებიც პერსონალურ მონაცემთა დაცვა და გამოძიებაა, იგივეა, რაც შინაგან საქმეთა და განათლების სამინისტრო ერთად ჩამოყალიბდეს.

კობახიძემ თქვა ისიც, რომ ინსპექტორის სამსახურში ორი მიმართულების თავსებობა მათი გუნდის ერთ-ერთი ლიდერის პოლიტიკური ინტერესი იყო, თუმცა მაშინაც გუნდში ბევრს "სწორი" პოზიცია ჰქონდა. კითხვაზე, იყო თუ არა ეს ყოფილი პრემიერმინისტრი, გიორგი გახარია, კობახიძე ამბობს, რომ "არავითარ გვარს" არ ასახელებს.

სახელმწიფო ინსპექტორის, ლონდა თოლორაია ინსპექტორის სამსახურის შესაძლო გაუქმებასთან დაკავშირებულ პროცესს "სრულიად კონსპირაციულს" უწოდებს. მისივე განცხადებით, "ოცნების" კანონპროექტი ძალიან საშიში პრეცედენტია არა მხოლოდ სახელმწიფო ინსპექტორის სამსახურისთვის, არამედ ქვეყნისთვის და არჩევით თანამდებობაზე მყოფი ყველა პირისთვის.

მისივე თქმით, ეს არის სიგნალი, რომ ისინი "ძალიან ჭკვიანად" უნდა იყვნენ. თოლორაია ამბობს, რომ კანონპროექტის ინიცირება წინასაახალწლო პერიოდს დაემთხვა, როდესაც დიპლომატიური კორპუსისა და საერთაშორისო ორგანიზაციების წარმომადგენლების უმრავლესობა საქართველოში არ იმყოფება. ამასთან, მისივე განცხადებით, ეს ასევე დაემთხვა სახელმწიფო ინსპექტორის დეკრეტში ყოფნას.

ქართულ ოცნებას სახელმწიფო ინსპექტორის სამსახურის გაუქმება და მის ბაზაზე ორი ახალი უწყების — სპეციალური საგამოძიებო სამსახურისა და პერსონალურ მონაცემთა დაცვის სამსახურის შექმნა სურს. შესაბამისი კანონპროექტი უკვე მომზადებული და ინიცირებულია. როგორც On.ge-ს დოკუმენტის ერთ-ერთმა ავტორმა, გურამ მაჭარაშვილმა განუცხადა კანონპროექტი დღეს, 27 დეკემბერს ბიუროს სხდომაზე იქნება წარდგენილი.

აღსანიშნავია, რომ პერსონალურ მონაცემთა დაცვის სამსახური აქამდეც არსებობდა. სწორედ მისი გაუქმების შემდეგ, 2019 წლიდან ამოქმედდა სახელმწიფო ინსპექტორის სამსახური და სხვა ფუნქციებიც შეითავსა.

სახელმწიფო ინსპექტორის სამსახურს ამ პერიოდში არაერთხელ გაუვრცელებია ინფორმაცია სამართალდამცავი ორგანოების თანამშრომლების მიერ ჩადენილი დანაშაულის შესახებ, თუმცა ყველაზე დიდი გამოხმაურება ექსპრეზიდენტ მიხეილ სააკაშვილზე მომზადებულმა დასკვნამ გამოიწვია. დოკუმენტის მიხედვით, იუსტიციის სამინისტრომ პატიმარ მიხეილ სააკაშვილის პერსონალური ინფორმაციის გასაჯაროებით კანონი დაარღვია. უწყებამ კადრების გავრცელების გამო იუსტიციის სამინისტრო და პენიტენციური სამსახური დააჯარიმა და მათი წაშლა დაავალა. აღსანიშნავია, რომ ერთი კვირის წინ, 19 დეკემბერს ქართული ოცნების თავმჯდომარემ, ირაკლი კობახიძემ თქვა, რომ ინსპექტორის დასკვნას არ ეთანხმება. მისი განცხადებით, ექსპრეზიდენტის უფლებები არ შელახულა და როცა საუბარია იმაზე, რომ მოქალაქეებმა პრეზიდენტი იხილეს ასეთ მდგომარეობაში, სააკაშვილი ადამიანებმა მანამდეც ნახეს "სახურავზე კარლსონივით" და "თმებით როგორ ათრევდა უკრაინელი სამართალდამცავი".

ამავე თემაზე: