ჯანდაცვის მინისტრის, ეკატერინე ტიკარაძის თქმით, ქვეყანაში კორონავირუსი ეფექტურად იმართა. მისივე თქმით, ჯანდაცვის სამინისტროში დღეს სახეზეა სისტემა, რომელიც ადეკვატურად, სწორად და დროულად რეაგირებს პანდემიაზე.

"შეიძლება ითქვას, რომ მოლოდინი იმის, რომ ჯანდაცვის სიტემა ვერ გაუძლებდა პანდემიის მართვას, ფაქტობრივად უარყოფილი შეიძლება იქნეს, ვინაიდან უპრეცენდენტოდ მაღალი რაოდენობის პაციენტების მართვა მოხდა ჯანდაცვის სისტემიდან და დღესდღეობით ჩვენ უკვე სახეზე გვაქვს კომპლექსური და სისტემური პასუხის გაცემის უნარის მქონე სისტემა ჯანდაცვაში, რომელიც ადეკვატურად, სწორად და დროულად რეაგირებს პანდემიაზე.

აქედან გამომდინარე, საერთო ჯამში, ეს იყო, რა თქმა უნდა, ურთულესი პერიოდი ძალიან მნიშვნელოვანი გამოწვევებით, ხშირ შემთხვევაში უცნობი გამოწვევებით, რაზეც პასუხი იმ მომენტისთვის არ არსებობდა, არამხოლოდ საქართველოში, არამედ მსოფლიოშიც, მაგრამ ჯანდაცვის ერთობლივი გუნდის მხრიდან იყო ყოველთვის დროული რეაგირება და ადეკვატური ქმედება", — განაცხადა მინისტრმა.

ჯანდაცვის მინისტრმა ეკატერინე ტიკარაძემ დღეს, 26 დეკემბერს სამინისტროს შემაჯამებელ ანგარიშს წარადგინა.

26 დეკემბრის მონაცემებით, საქართველოში კორონავირუსის 1 661 ახალი შემთხვევა დადასტურდა, გამოჯანმრთელდა — 3 841, ხოლო გარდაიცვალა 69 ადამიანი.

ბოლო 24 საათში ქვეყნის მასშტაბით ჩატარდა 32 741 კვლევა ტესტით, მათ შორის, 18 421 კვლევა ანტიგენის ტესტით და 14 320 PCR ტესტით.

რაც შეეხება დადებითობის მაჩვენებელს, 25 დეკემბრის მდგომარეობით, დადებითობის დღიური მაჩვენებელი არის 5,07%, ბოლო 14 დღის მანძილზე — 5,93% ხოლო 7 დღის მანძილზე — 5,21%.