ევროპის საბჭოს საპარლამენტო ასამბლეის (PACE) მომხსენებლები მოუწოდებენ საქართველოში არსებულ ყველა პოლიტიკურ ძალას, უკიდურესად პოლარიზებული პოლიტიკური კლიმატი დაძლიონ.

8-10 დეკემბერს, ქვეყანაში მათი ვიზიტის შემდეგ, ევროპის საბჭოს საპარლამენტო ასამბლეის საქართველოს მონიტორინგის ჯგუფის თანამომხსენებლებმა, ტიტუს კორლატენმა და კლოდ კერნმა ქვეყანაში არსებული უკიდურესად პოლარიზებული კლიმატის გამო უკიდურესი შეშფოთება გამოხატეს, რომელიც ყოველგვარ პოლიტიკურ თანამშრომლობასა და დიალოგს აფერხებს.

"ეს ძირს უთხრის ქვეყანაში პოლიტიკურ სტაბილურობასა და დემოკრატიის კონსოლიდაციას და რისკის ქვეშ აყენებს იმ მნიშვნელოვან პროგრესს, რასაც საქართველომ მიაღწია ამ წლების განმავლობაში", — ნათქვამია განცხადებაში.

მომხსენებლებმა ხაზი გაუსვეს, რომ დემოკრატიის კონსოლიდაციასა და ქვეყნის ევროატლანტიკურ ინტეგრაციაზე პასუხისმგებლობას იზიარებს ყველა პოლიტიკური პარტია, ამიტომ, ორ უდიდეს პარტიას — ქართულ ოცნებასა და ნაციონალურ მოძრაობას მოუწოდებს საერთო ეროვნული კეთილდღეობა ნებისმიერ ვიწროპარტიულ პოლიტიკურ სტრატეგიებზე მაღლა დააყენონ.

მომხსენებლებმა აღნიშნეს, რომ 2021 წლის ოქტომბრის ადგილობრივი თვითმმართველობის არჩევნები, როგორც ისინი შიშობდნენ, იყო დე ფაქტო პლებისციტი მმართველი უმრავლესობისთვის, რის შედეგადაც საარჩევნო გარემო უფრო გამკაცრდა. ამიტომ, ისინი მიესალმებიან რომ წლის დასაწყისში, კონსენსუსის შედეგად, არჩევნებთან დაკავშირებული საკანონმდებლო ბაზა მნიშვნელოვნად გაუმჯობესდა, რამაც სარგებელი მოიტანა არჩევნების ორგანიზებისას. ამავე დროს, მათ შეშფოთება გამოთქვეს ადმინისტრაციული რესურსების ბოროტად გამოყენებისა და ამომრჩეველზე ზეწოლის, ასევე, ძალადობის ფაქტების გამო. ისინი მოუწოდებენ ხელისუფლებას, სრულად და გამჭვირვალედ გამოიკვლიოს არჩევნებთან დაკავშირებული ყველა ბრალდება.