კლუბ ხიდის წარმომადგენელი, სოფო ებრალიძე ღამის კლუბების შესახებ შრომის ინსპექციის პასუხად აცხადებს, რომ ამ ღამით კლუბები იხსნება. ებრალიძე ვიდეოს აქვეყნებს, სადაც ხსნის, რომ კლუბში ყველა რეგულაცია დაცულია — განთავსებულია დეზობარიერები, სადეზინფექციო ხსნარები და პერსონალს უკეთია პირბადეები.

"დაუმესიჯეთ პრემიერმინისტრს. ამაღამ კლუბები იხსნება", — წერს ებრალიძე.

შრომის ინსპექციის განცხადებით, საკოორდინაციო საბჭოს ღამის კლუბების გახსნაზე გადაწყვეტილება აღნიშნულ ეტაპზე არ მიუღია, შესაბამისად, ღონისძიებების გამართვა ნებადართული არ არის. მათივე განმარტებით, მიმდინარეობს მუშაობა ე.წ. ღამის კლუბების უსაფრთხოების პროტოკოლის პროექტის შემუშავებაზე, რომელიც უწყებათაშორის საკოორდინაციო საბჭოს წარედგინება და მიღებული იქნება შესაბამისი გადაწყვეტილება.

მწვანე პასპორტების ამოქმედების მიუხედავად, კლუბების მუშაობა ჯერ დაშვებული არ არის. 4 დეკემბერს შრომის ინსპექციამ კლუბი ხიდი 10 000 ლარით დააჯარიმა და დალუქა. კლუბის წარმომადგენლებმა "ესკალაციის თავიდან აცილების მიზნით", ტერიტორია დატოვეს, თუმცა პასუხისმგებელ პირებს "გონივრულ ვადა" მისცეს, რათა მათი მუშაობა დაუშვან. მათი თქმით, სხვა შემთხვევაში, "მხოლოდ წინააღმდეგობას მიიღებენ".

დღეს, 17 დეკემბერს რამდენიმე კლუბი იხსნება.