კლუბ ბასიანის დამფუძნებლის, ნაჯა ორაშვილის განცხადებით, თითქმის ორ წლიანი პაუზის შემდეგ, 17 დეკემბერს კლუბების კარი გაიხსნება. ორაშვილი წერს, რომ მალე შეხვდებიან საცეკვაო მოედანზე და იმედს გამოთქვამს, რომ კლუბების კარი აღარასდროს დაიხურება.

"ელექტრონული მუსიკისა და საკლუბო კულტურის აღდგენის ფონდის და Act4culture / The Cultural and Creative Industries Union of Georgia-ის მიერ ინიციირებული უსაფრთხო ღონისძიებების იდეა მხარდაჭერილია.

სამოქმედო გეგმას საფუძვლად უდევს ღია და დახურულ სივრცეებში ჩვენს მიერ ჩატარებული ორი საპილოტე ღონისძიების კვლევის შედეგი. ამ ეტაპზე მიმდინარეობს სახელმძღვანელო დოკუმენტში ტექნიკური საკითხების დაზუსტება, იმისთვის რომ ელექტრონული მუსიკის სივრცეებმა მოიპოვონ უსაფრთხო ღონისძიებისთვის საჭირო მწვანე სტატუსი", — წერს ნაჯა ორაშვილი.

გუშინ ჯანდაცვის სამინისტროში შრომის ინსპექციისა და ღამის კლუბების წარმომადგენლების შეხვედრა გაიმართა. როგორც შრომის ინსპექციის სამსახურის უფროსმა, ბექა ფერაძემ განაცხადა, კლუბების ფუნქციონირების აღდგენის მიზნით, გარკვეული შეთანხმება უკვე შედგა და მას საკოორდინაციო საბჭოს წარუდგენენ. კერძოდ, მწვანე პასპორტის გარდა, მოთხოვნებს შორის იქნება შესაბამისი სავენტილაციო სისტემები, ადამიანების რაოდენობრივი შეზღუდვა და სხვა.

აღსანიშნავია, რომ მწვანე პასპორტების ამოქმედების მიუხედავად, კლუბების მუშაობა ჯერ დაშვებული არ არის. 4 დეკემბერს შრომის ინსპექციამ კლუბი ხიდი 10 000 ლარით დააჯარიმა და დალუქა. კლუბის წარმომადგენლებმა "ესკალაციის თავიდან აცილების მიზნით", ტერიტორია დატოვეს, თუმცა პასუხისმგებელ პირებს "გონივრულ ვადა" მისცეს, რათა მათი მუშაობა დაუშვან. მათი თქმით, სხვა შემთხვევაში, "მხოლოდ წინააღმდეგობას მიიღებენ".