დეპუტატ ელენე ხოშტარიას თქმით, უხარია, რომ მისი ჯიბიდან გადაიხდის 2013 წლის 17 მაისს დაზარალებული ადამიანებისთვის კომპენსაციას. ასე ეხმაურება ის სტრასბურგის სასამართლოს გადაწყვეტილებას, რომელმაც სახელმწიფოს ამ ადამიანებისთვის €193 500-ის გადახდა დააკისრა.

"ზოგი წერს, რა ცუდია, რომ ჩვენ უნდა გადავიხადოთო. ცუდი, რაც მოხდა ის არის. პლიუს, დიახ, ყველამ უნდა გავინაწილოთ პასუხისმგებლობა იმ სიველურის გამო, რომელსაც ამ ქვეყნის უმრავლესობა ახორციელებდა და მერე 5 ივლისსაც გაიმეორეს, იმიტომ, რომ ერთხელ გაუვიდათ. სიმართლე ვთქვათ, დიდი წინააღმდეგობაც არ შეხვედრიათ. ამიტომ დიახ, ძალიან მიხარია, რომ გადავიხდით ამ კომპენსაციას, ჩვენი ჯიბიდან", — წერს ხოშტარია სოციალურ ქსელში.

ხოშტარია ამბობს, რომ 2013 წლის 17 მაისს ისიც თავისუფლების მოედანზე იდგა. მისი შეფასებით, ამ დღეს ლგბტქ+ ადამიანებს უთხრეს, რომ მათი არსებობა არ უნდოდათ, სტრასბურგის სასამართლომ კი ყველას აჩვენა, რომ ისინი დაუცველები არ არიან.

"თვალწინ მიდგას 17 მაისს ის სახეები, თვალები, მოძრაობები, როცა სასულიერო პირები, გავეშებული უმრავლესობა და სახელმწიფო ერთად დაესხა თავს ათეულობით ადამიანს. არავის არაფერს რომ არ უშავებ და მხოლოდ არსებობის გამო სასიკვდილოდ რომ გიმეტებენ. მე თავისუფლებაზე ვიდექი და მახსოვს საკუთარი შიშიც როცა შავი აგრესიული ტალღა წამოვიდა.

იმ მომენტში ამ ხალხს უთხრეს, შენი არსებობა არ გვინდაო, მოგერევითო, გაგსრისავთო. დღეს ყველას გვითხრა სტრასბურგმა, რომ არ არიან ისინი დაუცველები. სადღაც მაინც არსებობს რაღაც ინსტიტუტი, რომელიც არ დააჩაგვრინებს", — აცხადებს ხოშტარია.

ადამიანის უფლებათა ევროპულმა სასამართლომ 2013 წლის 17 მაისის საქმის დაზარალებულებისთვის სახელმწიფოს €193 500-ის გადახდა დააკისრა. სტრასბურგის სასამართლომ გადაწყვეტილება დღეს, 16 დეკემბერს გამოაცხადა. კერძოდ, ევროპულმა სასამართლომ თქვა, რომ ყველა აპლიკანტის მიმართ განხორციელდა არაადამიანური მოპყრობა (მუხლი 3); დაირღვა ლგბტქ ადამიანებისა და ორგანიზაციების მშვიდობიანი შეკრების უფლება (მუხლი 11) დისკრიმინაციულად (მუხლი 14).

სასამართლომ, ასევე, დაადგინა, რომ ლგბტ დემონსტრანტების ბრბოსგან დასაცავად ხელისუფლებამ ზომები ვერ მიიღო, მიუხედავად იმისა, რომ მოვლენასთან დაკავშირებული რისკების შესახებ საქმის კურსში იყო. გარდა ამისა, სასამართლო ამბობს, რომ არსებობდა მტკიცებულებები, კერძოდ, დამოუკიდებელი ჟურნალისტების მიერ გადაღებული ვიდეოკადრები, რომ მზადდებოდა ძალადობა.